Իշխանության ներսում անհամաձայնություն կա

Իշխանական ղեկի մոտ գտնվող կուսակցության անդամները լռել են, որպեսզի իրենց չվտանգեն...Հիմա պահը հասունացել է.ՀՀԿ-ում և՛ ներսից ճաքեր կան, և՛ անհամաձայնություն կա, և՛ հին ու նոր սերնդի բախում, ամեն ինչ կա: Fnews.am-ի հետ զրույցում անդրադառնալով ՀՀԿ ներկուսակցական խնդրիներին՝ ասաց տնտեսագետ Վարդան Բոստանջյանը:

Նա այս բոլոր փոփոխությունները բնական է համարում՝ ինչ որակում էլ որ ստանալու լինեն.«Ընթանում են պրոցեսներ, որոնք խոշոր առումով, որևէ անձով կամ անձերի հետ չեն պայմանավորում, այլ պայմանավորվում են այդ պրոցեսների զարգացմամբ»,-նշում է տնտեսագետը և փորձում կանխատեսել ակնկալվող զարգացումները:
Վարդան Բոստանջյանը նկատում է, որ Հայաստանում քաղաքական դաշտն, իր դասական ձևով, ձևավորված չէ, ու հենց այս գործընթացն էլ տանում է այդ դաշտի ձևավորմանը: Նա դժվարանում է հստակ ժամանակացույց ներկայացնել, թե որքան կպահանջվի քաղաքական դաշտի ձևավորման համար, սակայն վստահ է՝ ներքաղական իրավիճակը տանում է դրան:
«Սա պրոցես է, որն իր մեջ ունի ինքնամաքրման, համակարգը՝ համակարգ դարձնելու տարր ... կարծում եմ, որ աշխարհի բոլոր երկրներում էլ, որոնք ունեն ավելի ժողովրդավարական, ավելի ընդգծված և կանոնակարգված հարաբերություններ, ամեն ինչ աստիճանաբար են անում... մենք ցանկացած լավ բան ուզում ենք հապշտապ, շուտափույթ ունենալ կամ տիրանալ: Նման բան չի լինում աշխարհում: Ամեն ինչ իր զարգացման մեջ է հասնում կատարելիության»,-ասում է Վարդան Բոստանջյանը:
Նա նկատում է, որ մեզ մոտ դա կարծես շատ երկար է տևում, բայց միևնույն ժամանակ նշում է, որ այլընտրանք չունենք:
«Ելնելով մեր իշխանության գոյություն ունեցող կառավարման համակարգից՝ նրանք հնարավորություն ունեն դրսևորվելու, իրենց տեսակետերն արտահայտելու, բայց միևնույն ժամանակ իշխանական ղեկի մոտ գտնվող կուսակցության անդամները, իմ կարծիքով, ժամանակին ոչ թե համակերպվել, այլ լռել են: Լռել են, որպեսզի իրենց չվտանգեն և անցանկալի զարգացումներ տեղի չունենան: Հիմա արդեն պահը հասունացել է. մարդիկ, որոնք որ գտնվել են իշխանության մեջ, ոչ թե այսօր ծագեց նրանց մեջ դժգոհությունը, կամ անհամաձայնությունը, այլ նրանց մոտ դա արդեն ձևավորված էր, հիմա պարզապես դա դրսևորվեց, և նրանք հիմա ընդդիմադիր կեցվածք են ընդունում»,-նշեց Վարդան Բոստանջյանը: