Իսրայելը կմասնակցի Եվրատեսիլ 2026-ին

Արհեստական բանականության արդյունավետ կիրառում, օբյեկտների ճշգրիտ ֆիքսացիա, փաստագրում և վերահսկում, հեռահար տեսանելիություն, անբարենպաստ եղանակային պայմաններում աշխատունակություն և ամենակարևորը՝ անվտանգային բարձր մակարդակ։ Սրանք այն հիմնական տեխնիկական բնութագրիչներն են, որոնք առանձնացնում են այն անօդաչու թռչող սարքերը, որոնցով այս տարվա ապրիլին համալրվել է ՆԳ նախարարության Ոստիկանությունը։ Այդ մասին հայտնում են Ներքին գործերի նախարարությունից:

Դրոնների տեխնիկական հնարավորություններին, առանձնահատկություններին և գործառութային կիրարկելիությանը ծանոթանալու, ինչպես նաև դրանց գործարկումը տեղում՝ իրական ժամանակում դիտարկելու նպատակով դեկտեմբերի 1-ին ՆԳՆ Ոստիկանության Օպերատիվ կառավարման կենտրոնում անցկացվել է միջգերատեսչական հանդիպում։

ԱԹՍ-ի կառավարումը՝ Երևանից, գործողությունների իրականացնումը՝ Վանաձորում։ Մասնագետները Օպերատիվ կառավարման կենտրոնում ծանոթանում են անօդաչու թռչող սարքերի ամբողջական հնարավորություններին և տալիս հստակ հրահանգներ։

Spartech ՓԲԸ տեխնիկական տնօրեն Արման Խաչատրյանը վստահեցնում է՝ արհեստական բանականությամբ համալրված ժամանակակից անօդաչու թռչող սարքերի տեխնիկական հնարավորությունները, համապատասխանեցված կոնկրետ ծառայությունների պահանջներին, կարող են նպաստել պետական մարմինների օպերատիվ արձագանքման, կանխարգելիչ աշխատանքների և անվտանգության ապահովման արդյունավետությանը։

Նրա խոսքով՝ Աղետների ռիսկի կառավարման համատեքստում արհեստական բանականությամբ և ջերմատեսողական համակարգերով համալրված այս սարքերը կարողանում են հայտնաբերել և ֆիքսել կրակի աղբյուրներ, հրդեհի օջախներ, ինչպես նաև տարանջատել նավակները, տրանսպորտային միջոցները և այլ տեխնիկական օբյեկտներ։ Սա թույլ է տալիս ժամանակին հայտնաբերել հնարավոր վտանգները, գնահատել իրավիճակը և ապահովել օպերատիվ ու արդյունավետ արձագանք արտակարգ պայմաններում։

Ընկերության տնօրեն Հրայր Քամալյանն անդրադառնալով անօդաչու թռչող սարքերի արդյունավետությանը՝ նշել է, որ դրանց կիրառումը պետական կառավարման համակարգում, մասնավորապես՝ ուժային կառույցներում առավել նպատակահարմար է, քանի որ ներդրված խելացի տեխնոլոգիաների շնորհիվ ապահովվում է պետական գաղտնիք պարունակող տեղեկատվության կոդավորումն ու հասանելիությունը միայն իրավասու գերատեսչությանը։

Autel Robotics ընկերության ԵՄ տարածաշրջանի վաճառքի մենեջեր Ադամ Ֆու Վեյը, բարձր գնահատելով ՆԳ նախարարության հետ համագործակցությունը, անդրադարձել է անվտանգային ժամանակակից համակարգերի ներդրման կարևորությանը և ընդգծել, որ այն թույլ է տալիս զարգացնել նոր տեխնոլոգիական լուծումներ, օպտիմալացնել գործընթացները։

«Հայաստանյան գործընկեր Spartech ընկերության հետ համագործակցությունն սկսվել է 2023 թվականից։ Այդ ընթացքում իրականացրել ենք մի շարք նախագծեր՝ մեր նորագույն դրոնները մատակարարելով Ներքին գործերի նախարարությանը։

Դրական արձագանքները մեզ կրկին բերել են այստեղ՝ լսելու լրացուցիչ կարծիքներ, հասկանալու իրական կիրառական կարիքները, կատարելագործելու տեխնոլոգիական լուծումները և գտնելու այն ուղիները, որոնք կարող են առավել արդյունավետ դարձնել մեր հաճախորդների աշխատանքը։

Հուսով եմ, որ առաջիկայում մեր ամբողջական ինքնավար թռիչքային համակարգի կիրառումն ընդլայնվելու է Հայաստանում, մասնավորապես՝ իրավապահ կառույցներում՝ ամրապնդելով ինչպես տեղական օպերացիոն կարողությունները, այնպես էլ մեր՝ չինական ընկերության և հայկական իրավապահ մարմինների համագործակցությունը»,-նշել է նա։

Միջգերատեսչական հանդիպումը, որին մասնակցում էին ՆԳ նախարարության, Ազգային անվտանգության ծառայության, Պաշտպանության նախարարության, Շրջակա միջավայրի նախարարության, Քաղաքացիական ավիացիայի կոմիտեի, Երևանի քաղաքապետարանի և շահագրգիռ այլ գերատեսչությունների ներկայացուցիչներ ևս մեկ անգամ արձանագրեց պետական կառավարման ոլորտում ժամանակակից թվային տեխնոլոգիաների ինտեգրման կարևորությունը՝ գործընթացներն առավել արդյունավետ, անվտանգ և վերահսկելի դարձնելու տեսանկյունից։