Ջերմուկում մեկնարկել է Գյուղական համայնքների երրորդ համաժողովը

Ջերմուկում այսօր մեկնարկել է Գյուղական համայնքների երրորդ համաժողովը, որն աշխատանքները կշարունակի մինչև հոկտեմբերի 5-ը: Այս մասին տեղեկացնում է Տարածքային կառավարման նախարարության մամուլի ծառայությունը: Համաժողովի ընթացքում կքննարկվեն տեղական ինքնակառավարման համակարգի և գյուղական համայնքների ամենաարդիական խնդիրները` ոլորտում ներգրավված բոլոր շահագրգիռ կողմերի` պետական, տեղական ինքնակառավարման մարմինների (ՏԻՄ), մարզերում տարբեր ծրագրեր իրականացնող տեղական և միջազգային կազմակերպությունների ներկայացուցիչների, փորձագետների մասնակցությամբ: Յուրաքանչյուր մարզից համաժողովին մասնակցում է տասը համայնքապետ ու ավագանու հինգ անդամ: Բացելով համաժողովը` ՀՀ տարածքային կառավարման նախարարի առաջին տեղակալ Վաչե Տերտերյանը նշել է, որ արդեն երրորդ անգամ անցկացվող միջոցառումն արդյունավետ հարթակ է ` ոլորտում գործող բոլոր դերակատարների երկխոսության, իրականացվող ծրագրերի վերաբերյալ տեղեկատվության ու փորձի փոխանակման համար: «Համաժողովի մասնակիցները հնարավորություն ունեն նաև ոլորտի անմիջական պատասխանատուներից տեղեկանալ իրականացվող բարեփոխումների և որդեգրված քաղաքականության մասին»,- ասել է նա: Վաչե Տերտերյանը կարևորել է, որ երրորդ համաժողովին, համայնքապետերից բացի, մասնակցում են նաև ավագանու անդամներ, քանի որ համաժողովի ընթացքում քննարկվելու են նաև ՏԻՄ-երի գործունեության արդյունավետության բարձրացմանը վերաբերող հարցեր: Համաժողովը հյուրընկալող Վայոց ձորի մարզպետ Էդգար Ղազարյանը ողջունել է և արդյունավետ աշխատանք մաղթել մասնակիցներին: Նա նկատել է, որ Գյուղական համայնքների համաժողովը Ջերմուկում արդեն ավանդաբար անցկացվող միջոցառումների շարքում իր ուրույն տեղն ունի: «Մենք սիրով ենք հյուրընկալում համաժողովը, քանի որ այն հրաշալի հնարավորություն է ընձեռում քննարկելու ոչ միայն գյուղական համայնքների, այլև տեղական ինքնակառավարման համակարգի զարգացման ինստիտուցիոնալ խնդիրները»,-նշել է մարզպետը: Համաժողովի շրջանակում կկազմակերպվեն համայնքների կայուն զարգացման խնդիրներին վերաբերող հետևյալ տասը թեմատիկ կլոր սեղանները. 1. Տեղական ինքնակառավարման ոլորտ . Վարչատարածքային բարեփոխումներ, համայնքների խոշորացման գործընթաց, տեսլական և արդյունավետություն: 2. Ստուգումներ և վարչական հսկողություն. Տեղական ինքնակառավարման մարմիններում պետական մարմինների կողմից իրականացվող ստուգումների (հսկողության, վերահսկողության) և վարչական հսկողության գործընթացի կանոնակարգում, վարչարարության հիմունքները և վարչական վարույթը համայնքներում: 3. Գնումների գործընթաց. ՀՀ համայնքներում գնումների իրականացման գործընթացի կանոնակարգում: 4. Մրցակցային համայնք. Համայնքների զարգացումը, մրցակցային համայնքի տեսլականը, համայնքների 4-ամյա զարգացման պլանները և դրանց իրավական կարգավորումները: 5.Շրջակա միջավայր. Հայաստանի կոշտ կենցաղային թափոնների կառավարում, բարելավման ծրագրեր, խնդիրներն ու լուծման առաջարկները:

6. Զբոսաշրջություն, տնտեսական զարգացում. Զբոսաշրջությունը որպես գործարար միջավայրի զարգացմանը նպաստող գործոն, համայնքային բրենդի ձևավորումը, զարգացումը և խթանումը, համայնքների մրցակցային առավելությունները, ներկա իրավիճակը, խնդիրները և լուծման առաջարկները: 7. Գյուղատնտեսություն. Գյուղատնտեսական քաղաքականությունը, օրենսդրական բացերը և անհրաժեշտ փոփոխությունները, գյուղացիական տնտեսությունների ներկա իրավիճակը, խնդիրները և լուծման առաջարկները: 8. Տեղական ինքնակառավարման ոլորտ. Համայնքի ավագանու գործունեությունը, թափանցիկությունը, իրավասությունների շրջանակը, «Ավագանու ինստիտուտ»-ի ձևավորումը, ընթացիկ խնդիրները և լուծման առաջարկները: 9. ՓՄՁ զարգացումը Հայաստանում. Հայաստանի փոքր և միջին ձեռնարկատիրության զարգացումն ու ներկա օրենսդրությունը, գործարարությունը տեղական մակարդակում, ՓՄՁ զարգացման ազգային կենտրոնի աջակցությունը: 10. Հողերի կառավարում . ՀՀ գյուղական համայնքներում հողային օրենսդրության պահանջներին համապատասխան վերահսկողության իրականացման ընթացքում առկա խնդիրների վերհանում և դրանց լուծման ուղիները: Այս տարի համաժողովի շրջանակներում կկազմակերպվեն նաև մարզական միջոցառումներ. մարզերի թիմերը կմասնակցեն շախմատի և նարդու մրցաշարերին, ինչպես նաև «Ինչ, որտեղ, երբ» ինտելեկտուալ խաղ-մրցույթին: