Կադրային փոփոխություններ՝ ԼՂՀ-ում.

«Հրապարակ» թերթը գրում է. «ԼՂՀ-ում կադրային փոփոխություններ են տեղի ունենում, ավելի ճիշտ՝ փոխատեղումներ («ռակիրովկաներ»), որոնք քաղաքական ենթատեքստ ունեն և իշխանության ներսում նոր վերադասավորումների են բերելու: Ամեն ինչ սկսվեց հոկտեմբերի 9-ին, երբ ԱԺ նիստի ժամանակ ԼՂՀ վերահսկիչ պալատի նախագահ, ՀՅԴ անդամ Արթուր Մոսիյանը հրաժարական տվեց: ԼՂՀ չինովնիկական շրջանում սպասում են Արթուր Մոսիյանի նոր նշանակմանը:

Վերնախավում կարծիք է տարածված, որ նա շուտով կզբաղեցնի ԼՂՀ գլխավոր դատախազի պաշտոնը, թեև ոչ ՎՊ նախագահը, ոչ էլ գլխավոր դատախազն օրենքով չեն կարող որևէ կուսակցության անդամ լինել: Ինչևէ, Արթուր Մոսիյանի նոր նշանակումը, անշուշտ, կամրապնդի Ղարաբաղում իշխանական ուժ հանդիսացող ՀՅԴ ազդեցությունը: Վերջապես իրականություն կդառնա ՀՅԴ՝ ձեռքի տակ ուժային կառույց ունենալու երազանքը: Եթե հաշվի առնենք, որ փոխվարչապետ Արթուր Աղաբեկյանը ևս դաշնակցական է և ահռելի ազդեցություն ունի ԼՂՀ կառավարությունում, ապա ակնհայտ է, որ գլխավոր դատախազի պաշտոնն ստանձնելով, ՀՅԴ դիրքերն էապես ուժեղանում են: Արթուր Աղաբեկյանի վերաբերյալ քաղաքական շրջանակներում երկու կանխատեսում կա՝ որ նա ԼՂՀ վարչապետի ամենալուրջ հավակնորդն է, և երկրորդ՝ որ նա նախագահական ամբիցիաներ ունի: Ներկայիս գլխավոր դատախազ, նախկին ոստիկան, պատերազմի ժամանակ գումարտակի հրամանատար Արշավիր Ղարամյանին, ըստ իշխանության ներսում շրջանառվող լուրերի, ևս վառ հեռանկար է սպասվում:

Նա նախագահ Բակո Սահակյանի մտերիմ մարդկանցից է Արցախում, և վարկած է պտտվում, թե Բակո Սահակյանը, ով 2017 թվականի նախագահական ընտրություններում այլևս առաջադրվելու իրավունք չունի, հենց Արշավիր Ղարամյանին է տեսնում իր իրավահաջորդի կարգավիճակում: Իսկ մինչ այդ Ղարամյանը կարճ ժամանակով նշանակվելու է ԱԱԾ տնօրեն: Ղարամյանը Բակո Սահակյանի տեղակալն է եղել, երբ վերջինս ԼՂՀ գլխավոր ոստիկանապետն էր, իսկ պատերազմի ժամանակ ենթարկվել է ԼՂՀ նախագահի հիմնական «ընդդիմությանը»՝ Վիտալի Բալասանյանին:

ԱԱԾ այսօրվա ղեկավարը՝ Վիկտոր Քոչարյանը, Ռոբերտ Քոչարյանի բարեկամն է, ըստ ամենայնի, դառնալու է Անվտանգության խորհրդի քարտուղար, սակայն նա ԼՂՀ իշխանական շրջանում էական ազդեցություն չունի: Ըստ ԼՂՀ վերնախավում տարածված կարծիքների, ՀՅԴ թևն ուժեղացնելով, Բակո Սահակյանը նպատակ ունի թուլացնել իր հակառակորդին՝ ԼՂՀ նախկին նախագահ Արկադի Ղուկասյանին, ով 10 տարի ղեկավարել է Ղարաբաղը և ղարաբաղյան Օլիմպոս վերադառնալու մեծ ջանքեր է գործադրում: 2017 թվականի ընտրություններում նա նախագահի հիմնական թեկնածուներից է լինելու, սակայն ՀՅԴ-ն նրան չի տեսնում նախագահի աթոռին, և, բացի այդ, այսօր նա էական դեր չի խաղում արցախյան քաղաքական գործընթացներում: Անգամ Արցախի ժողովրդավարական կուսակցությունում, որն այստեղ հիմնական իշխանական ուժն է, և որը ժամանակին Արկադի Ղուկասյանի քաղաքական հենարանն էր, նրա ազդեցությունը սասանվել է: Քանի որ Արկադի Ղուկասյանի «աստեղային ժամերը» համընկել են Ռոբերտ Քոչարյանի վերջին նախագահության տարիների հետ, ձևավորված կարծիք կա, որ նոր ընտրություններում նա, հնարավոր է, Քոչարյանի ֆավորիտը լինի: Մյուս կողմից, մարդիկ հիշում են, որ ժամանակին Արկադի Ղուկասյանին նախագահ դարձրեց Սամվել Բաբայանը, մինչդեռ Քոչարյանն այդ ժամանակ, 1997 թվականին, ջանում էր իշխանության բերել Լեոնարդ Պետրոսյանին, ինչը չստացվեց, և Քոչարյանը նրան բերեց Երևան, նշանակելով ՀՀ պաշտպանության նախարարի տեղակալ;

Մանրամասները՝ թերթի այսօրվա համարում