Կալանավորվածներից մեկը՝Սամվել Բաբայանի մարտական ընկերն է

Լեռնային Ղարաբաղի պաշտպանության բանակի նախկին հրամանատար Սամվել Բաբայանը, ով մեղադրվում է "Իգլա"-ի արձակման խողովակ և "939" տեսակի հրթիռի ապօրինի շրջանառության գործի շրջանակներում, ԱԱԾ-ում նախ հարցաքննվել է որպես կասկածյալ, իսկ մարտի 24-ին նրան  առաջադրվել է մեղադրանք, որից հետո էլ, նույն օրը միջնորդություն է ներկայացվել Կենտրոն եւ Նորք Մարաշ վարչական շրջանների ընդհանուր իրավասության դատարան: Դատարանը   բավարարվել է միջնորդությունը, իսկ արդյունքում,  Բաբայանը կալանավորվել է երկու ամսով:

Այս օրերին, քաաղաքական տարբեր շրջանակների ու դեմքերի կողմից, այդ թվում նաեւ նրա մարտական ընկերների,  բազում տեսակետներ հնչեցին այն մասին, որ Բաբայանի կալանավորումը քաղաքական ենթատեքստ ունի, եւ որ  դա նրա նկատմամբ իրականացված քաղաքական հետապնդման արդյունք է:

Արդյո՞ք Բաբայանը եւս այդպես է կարծում, փորձեցինք հետաքրքրվել վերջինիս փաստաբան Ավետիս Քալաշյանից, ով Fnews.am-ի հետ զրույցում ասաց հետեւյալը.«Այս պահի դրությամբ մենք նման կարծիք չունենք, բավարար հիմքեր էլ չունենք նման բան ենթադրելու համար: Նման կարծիք կունենանք այն ժամանակ, երբ քրեական գործով ապացուցվի իր անմեղությունը, սակայն շարունակվի Բաբայանի նկատմամբ քրեական հետապնդումը»:

Ճշտող հարցին, թե "Իգլա"-ի գործով  կալանավորված անձանց  ճանաչում է պաշտպանյալը, թե ոչ, փաստաբանը  նշեց, որ.«Նրանցից մեկին այո, ճանաչում է: Կալանավորվածներից մեկը Սամվել Բաբայանի մարտական ընկերն է: Այս պահին զերծ կմնամ ավելորդ մեկնաբանություններ անելուց: Կասեմ միայն, որ վաղ թե ուշ հանրությունը կտեղեկանա, որ Բաբայանը կապ չունի մեղսագրվող արարքի հետ: Միանշանակ ասել, որ մեղադրանքում տեղ գտած այն ձեւակերպումները, որ Սամվել Բաբայանը պատվիրել է այդ զենքը բերել, պարտավորվել է դրա գումարը վճարել, հանձնարարել է ինչ-որ գործողություններ կատարել եւ այլ,այդ բոլորի հետ Սամվել Բաբայանը որեւէ կապ չունի»: