Կառավարությանը «պադստավկա անողները »…

Շաբաթվա խայատառակությունն ու տեղական բյուջեին հասցված ապտակը.

Հրազդանի քաղաքապետարանը համայնքային բյուջեից 15 մլն դրամ էր տրամադրել `Կոտայքի նորաբողբոջ մարզպետի ոստանը վերանորոգելու ու եվրո տեսքի բերելու համար:

Մի քանի օր շարունակ տարբեր լրատվամիջոցներով քննարկվող այս թեման չէր կարող մեր ուշադրությունից զերծ մնալ, քանի որ այս անհեթեթությունը` հանուն Կոտայքի մարզի նորաթուխ մարզպետի համայնքային բյուջեից 15 մլն դրամ «քցվելը», կարելի է ապտակ համարել ոչ միայն ՀՀ Կառավարությանը`բյուջեն լցնելու ու տնտեսելու ուղղությամբ միտված քայլերի համատեքստում, այլեւ ողջ հրազդանցիներին:

Որոնցից շատերը, ոչ թե 15 մլն դրամի, այլ 15 հազար դրամի պատճառով շատ հաճախ հասել են նույն քաղաքապետարանի, ինչու չէ նաեւ հայրենի կառավարության դուռը, եւ քոռ ու փոշման հետ եկել: Իսկ եթե Հրազդանի քաղաքապետը այդքան խղճից թույլ մարդ է, որ հանուն նորագույն մարզպետի փափուկ վայրէջքի, համայնքային բյուջեն հրամցնում է որպես «մաղարիչ», ապա նրան խորհուրդ ենք տալիս, նման մաղարիչները կատարել ճիշտ եւ ճիշտ իր սեփական գրպանից…Հետո էլ առանց ամաչելու վազում եք ՀՀ կառավարություն, ու սկսում եք համայնքային բյուջեի դարդը լացել…

Իսկ ինչ վերաբերում է մեծն Բուլկուն`Կոտայքի ներկայիս մարզպետին, ապա Հայաստանի բնապահպանության ոլորտը «հոշոտած» նորանշանակ մարզպետը, հետաքրքիր է, թե ի՞նչ էր խելքին փչել, որ մարզային աշխատանքների մեկնարկը որոշել էր սկսել իր «կուպեից»…Իսկ այն  սարքելու համար, ըստ մամուլում տարածված տեղեկությունների վատնել էր մոտ 60-70 մլն դրամ: 15 մլն-ի հասցեն թերեւս պարզվեց, հիմա գանք գլխավոր հարցին. իսկ մնացած միլիոնները ի վերջո կարո՞ղ ենք իմանալ թե ո՞վ էր գրեֆ արել մեր օրեցօր փքվող բուլկուն… Գուցե մեծն մարզպետը որոշել է տարիներով դիզած միլիոնների՞ն դիպչել`հանուն իր նստավայրի:

Եղածը ընդամենը մի 60-70 միլիոն դրամի ծախս է, մեծ բան չի: Այստեղ բացահայտվում է Արամ Հարությունյանի հերթական տաղանդը՝ ինչպես «լափել» բյուջեն: Սա նաև նոր բյուջե հավաքելու հիանալի միջոց է՝ սեփական կարիքների վրա մսխելով պետական միջոցները: Մարզպետը վարչապետից կարող է ակնկալել նոր միջոցներ՝ իբրև թե մարզային խնդիրները լուծելու համար: Իսկ խնդիրները մնում են և կմնան այնքան ժամանակ, քանի դեռ տեղական ֆեոդալները իրենց կաբինետների համար թանկարժեք կահույք ձեռքբերելու և իրենց աշխատավայրերը ամենաշքեղ եվրովերանորոգում անելու մոլի մրցավազքի մեջ են:

Ուշագրավն այն է, որ Կոտայքի մարզպետի դեպքում այս ամենը դեռ ընդամենը սկիզբն է: Ասում են, Արամ Հարությունյանը ծանոթանալով իր «քաջագործությունների» մասին մամուլում եղած այլ նախկին հրապարակումներին՝ այնուամենայնիվ անդրդվելի է մնացել իր համոզմունքներում և նույնիսկ իր նեղ շրջապատում կարծիք է հնչեցրել, թե «ես եմ որոշողը՝ ինչ անեմ, ոնց կուզեմ՝ տենց էլ կանեմ,հրազդանցիներին էլ մարզպետարանից կհանեմ»:
Մինչ օրս, մարզպետների դեպքում հաճախ այդպես էլ լինում է.ոնց ուզում ` տենց էլ անում են, կուզեն՝ կհարստանան, կուզեն՝ բյուջեն կուտեն ու կթալանեն… Նաև կուտեն՝ ինչ կուզեն, կուզեն՝ քյաբաբ, կուզեն՝ բուլկի, կամ էլ կուտեն քյաբաբ՝ կդառնան բուլկի: Տարբերակները շատ են...
Հետաքրքիր է՝ սահմանադրական բարեփոխումների շրջանակում, ինչ-որ փոփոխություններ նախատեսվու՞մ են՝ մարզպետների գործունեության և լիազորությունների հետ կապված: Վերջիվերջո, պետք է ընդունենք, որ քաղաքակիրթ մարդկությունը ֆեոդալիզմը վաղուց արդեն թաղել է միջնադարյան գերեզմանոցում, իսկ մենք բարեփոխումների ենք պատրաստվում,իսկ մեզ էլ է դա պետք:

Իսկ սյս տեսակ բեսպրելշիկներով , ֆեոդալ-բդեշխներով ու բյուջեի հերն անիծող անկուշտներով` հասատատ առաջ չենք գնա:

Միթե՞ կարելի է մի ամբողջ երկրի մարզ վստահել մի մարդու, ով հոգով եւ մտքով դեռ մնացել է բնապահապանության նախարարությունում, իսկ մարզային իշխանությունն էլ շփոթել է բնության սաղարթախիտ անտառների ու այնտեղից ստացվող բերք ու բարիքի հետ: Սա խայտառակության վերջն է, իսկ սրանց նմանները հերիք են բյուջեի ու կառավարության աշխատանքի պրավալը ապահովելու համար:

Միգուցե Արգամիչը ուշադրությունը սեւեռի ոչ միայն բյուջեն լցնելու ու ստվերը վերացնելու ուղղությամբ , այլ նաեւ փորձի միջոցներ ձեռնարկել`վերահսկելու թե ինչպես են մսխվում ու վատնվում համայնքային բյուջեները: Թե չէ պարկի մեջ ինչքան ուզում ես ցորեն լցրու, միեւնույն է. ծակողը`ծակելու է , տանողն էլ`տանելու է…

Հ.Գ.Կոտայքի մարզպետի  այս  խայտառակ  պատմության մեջ չմոռանանք  մի կարեւորագույն հարցի մասին եւս. հետաքրիր է՞ բուլկի Արամը`հանուն իր դուքյանի կառուցապատման շրջանառած 60-70 մլն դրամից  պատրաստվում է՞ հարկեր վճարել  պետբյուջե. ի վերջո այդ գումարները հարկային դաշտի թրի տակով անցնելու ե՞ն, թե՞ այդպես էլ չմաքսազերծված գումարներով բուլկի Արամը վայելելու է իր չհարկված 70 մլն-անոց կաբինետը... 

Արտյոմ Եդիգարյան