Կառավարությունը գործուն աշխատող թիմ է

Վարչապետ Կարեն Կարապետյանը կմնա՞ վարչապետ 2018-ից հետո, թե՞ ոչ. հարց, որը հանգիստ չի տալիս խորհրդարանական ընդիմությանը, հատկապես «Ելքին»։ Հետաքրքիր է, որ կառավարության 2018-ի ծրագրի քննարկման ժամանակ ավելի շատ հնչեց այս հարցը, քան եղան ծրագրային լուրջ դիտողություններ վերջիններիս կողմից։ Եթե նկատենք, որ կառավարությունն է տնտեսության պատասխանատուն, ապա այս հարցադրումը գուցե և տրամաբանական էր։ Իսկ տրամաբանակա՞ն էր այն, թե՞ քաղաքական շոու` հարցրինք մշակույթի նախարար Արմեն Ամիրյանին։

-Միանշանակ պատասխան տալ կդժվարանամ, կարծում եմ` այս դեպքում երկու մոտեցումներն էլ առկա են։ 
-Կառավարությունը ներկայացրել է 2018-ի իր ծրագիրը, սակայն որպեսզի մարդը հավատա ապագային, նա պետք է տեսնի այսօր իրականացվող ծրագրերի արդյունավետությունը և, դրանից ելնելով, հավանություն տա նախատեսվողին։ Վերջին ինն ամիսների ընթացքում Ձեր ոլորտում իրականացված ո՞ր ծրագրերն են տեսանելի։
-Մենք մեծամասշտաբ աշխատանք ենք իրականացրել կինոյի բնագավառում, սկսած հայեցակարգից մինչև օրենքի վերջնական մշակումը, որը ենթադրում է ոլորտի զարգացում։ Սա մեծածավալ ծրագիր է։ Նմանապես գրահրատարակչության մասով հստակ ծրագրեր ենք իրականացրել, որի արդյունքում ստեղծվել են նոր գրախանութներ, ձևավորվել են շարժական գրախանութներ՝ գրաբուսներ։ Ակտիվացել է մարզային գրադարանների աշխատանքը, բացի դրանից մարզային գրադարաններում ավելացել է ժամանցի էլեմենտը։ Բազմաթիվ այլ ծրագրեր ևս իրականացվել են, սակայն ժամանակի սղության պատճառով այդ բոլորը թվարկել հնարավոր չէ։
-Դուք, որպես նախարար, նկատո՞ւմ եք մշակույթի գործիչների գործնական աջակցությունը Ձեր կողմից տարվող քաղաքականության նկատմամբ։ Նրանք համամի՞տ են Ձեր մտահղացումներին։
-Այո, և դա նկատելի է։ Ավելին, մենք միասին կարողանում ենք գեներացնել այդ ծրագրերը և ստանում ենք մշակույթի գործիչների աջակցությունը։ Անշուշտ, կան նաև որոշակի դժգոհություններ, ինչը բնական է։ Երբ ոլորտը սկսում է առողջանալ, փոխվում են խաղի կանոնները, ապա այդ դեպքում դժգոհություններ ևս պետք է լինեն։
-Ի՞նչ եք կարծում` հայ կինոստուդիայի մասնավորեցումը․․․ 
-Ներեցեք, ձեզ ընդհատեմ և միանգամից ասեմ, որ խոսքը կինոստուդիայի մասնավորեցման մասին է։ Ինչպես նշեցի` մշակել ենք կինոյի հայեցակարգ օրենքը, որի նպատակն է շահագրգռել արտասահմանյան կինոինդուստրիային Հայաստանում գործելու համար։ Օրենքի համաձայն նախատեսվում է ներդրումների 20 %-ի վերադարձ։ Իհարկե, դա փոքր գումար է, արտասահմանյան կինոինդուստրիային շահագրգռելու համար, քանի որ մենք չունենք համապատասխան մասնագիտական բազա։ Հետևաբար, առաջին հերթին, մենք պետք է ստեղծենք կինոդպրոց միջազգային չափանիշներին համապատասխան։ Պետք է նկատեմ, որ հայ կինոինդուստրիան տեխնիկական հագեցվածության լուրջ խնդիր ունի։ Եթե միևնույն ժամանակ երկու լիամետրաժ ֆիլմ նկարահանվի այսօր, ապա եղած տեխնիկան չի բավարարի։ Այսինքն, մենք պետք է գեներացնենք նաև մասնավորի ներդրումները տեխնիկական բազայի ստեղծման համար։ Արդյունքում ունենալով օրենսդրական լավ դաշտ, բարձրակարգ մասնագետներ, տեխնիկական բազա և ներդրումների 20 %-ի վերադարձ՝ հնարավոր է մեր կինոինդուստրիան շահավետ բիզնեսի վերածել։
-Այո, սակայն ազգայինը այդ դեպքում չենք կորցնի՞։
-Ոչ, հակառակը, այդպիսով կնպաստենք ազգային կինոյի զարգացմանն ու արտադրությանը։ Ծրագրավորել ենք ստեղծել հանրապետական կինոթատրոնների նոր ցանց, որը նախատեսում է նոր կինոթատրոնների կառուցում, անկախ սեփականության ձևից։
-Պարոն նախարար, քանի որ մեր հարցազրույցը քաղաքական հարցով սկսեցինք, ուզում եմ քաղաքականով էլ այն ավարտել։ Երբ խոսվում է վարչապետի ժամանակավոր լինելու մասին, ապա դա վերաբերում է կառավարության ողջ թիմին, որի անդամ եք Դուք։ Ի՞նչ զգացողություն եք ունենում, երբ ասում են, որ այս կառավարությունը գործելու է մինչև 2018 թիվը։
-Այս ձևակերպման հետ համաձայն չեմ։ Վարչապետ Կարեն Կարապետյանի գլխավորած կառավարությունը շատ գործուն աշխատող թիմ է, որը շատ անելիքներ ունի, իսկ արվածը արդեն տեսանելի է։

Զրուցեց Ժասմեն ՎԻԼՅԱՆԸ