Կառավարությունը տառապում է անբուժելի ամլությամբ

«Քառօրյա պատերազմը ոչ թե պատերազմական իրավիճակ էր, այլ մեր երկրի քաղաքական անկարողությունը ցուցադրող մի սարսափազդու իրավիճակ»: Այս մասին Fnews.am-ի հետ զրույցում ասաց տնտեսագետ Զոյա Թադևոսյանը` անդրադառնալով շրջանառվող այն դիտարկումներին, ըստ որի, եթե չլիներ ապրիլյան պատերազմը` չէին լինի պաշտոնյաների ձերբակալություններ, պաշտոնանկումներ ու կոռուպցիայի և մենաշնորհի դեմ պայքարի մասին հայտարարություններ:

Զոյա Թադևոսյանը նկատում է, որ քառօրյից հետո իշխանություններն այլևս անկարող գտնվեցին մնալ վարագույրների հետևում, թաքցնել իրենց հանցագործությունները և մտածել միայն սեփական պահպանության մասին: «Նրանք ցույց տվեցին իրենց անկարողությունը, անգործությունը, անտարբերությունը երկրի իրավիճակի նկատմամբ և վերաբերմունքը` ազգային անվտանգության հանդեպ: Քառօրյան ցույց տվեց, որ երկրի տնտեսական և քաղաքական իշխանությունները խրվել են կոռուպցիոն ճահճի մեջ և ոչինիչ չեն անում, բացի սեփական շահերի բավարարումից ու գործում է կլանային համակարգ…»,- նկատում է տնտեսագետը:

Նրա խոսքով` ապրիլյան պատերազմն պարզապես բացեց կառավարության բոլոր խաղաթղթերը.«Կառավարությունը տառապում է անբուժելի ամլությամբ` ոչինչ չկարողանալու, ոչինիչ չանելու ունակությամբ, որովհետև անկուշտ են ու չեն սիրում Հայաստանը»,-ընդգծում է Զոյա Թադևոսյանը: Նա նկատում է, որ երկրի տնտեսությունը հասել է այնտեղ, որտեղից այն կողմ տեղ չկա գնալու այլևս: «Այ, ասում էին տնտեսությունը գահավիժում է, գահավիժում է… հիմա արդեն հատակում ենք: Հատակում, որը ճահիճ է: Էլ տեղ չկա: Խրվել մնացել ենք»,-ասում է տնտեսագետը` այնուամենայնիվ առաջարկելով այս վիճակից դուրս գալու իր դեղատոմսը: Նրա գնահատմամբ` բոլոր հիվանդությունների պատճառը ժողովրդավարական ինստիտուտների բացակայությունն է: «Ուզենք, թե չուզենք, սիրենք, թե չսիրենք, հավանեք, թե չհավանք կա մեկ ելք, ու դրա անունը ժողովրդավարություն է: Քանի դեռ Հայաստանում ժողովրդավարական ինստիտուտ չի ստեղծվել ու անխափան չի գործում, ՀՀ-ում կլինի կոռուպցիա, մենաշնորհ, երկիրը կլինի անպաշտպան, իշխանավորը` թույլ, նսեմացած, քաղաքացին սոված և արտագաղթող»,-ընդգծեց Զոյա Թադևոսյանը: