Կարեն Գրիգորյանը պարտվեց

Հայաստանի շախմատիստ Կարեն Հ. Գրիգորյանը, Չինաստանում ընթացող աշխարհի երիտասարդական առաջնությունում դուրս մնաց չեմպիոնական պայքարից:

Այսօր կայացած 11-րդ տուրում մեր գրոսմայստերը սեւ խաղաքարերով պարտվեց Յի Վեյին: Կարեն Հ. Գրիգորյանը մնաց իր 7 միավորով, իսկ ահա չինացի շախմատիստը վաստակեց 9 միավոր եւ էլ ավելի մեծացրեց առավելությունը:

Մեր շախմատիստն այժմ առավելագույնը կարող է պայքարել բրոնզե մեդալի համար: Դրա համար հարկավոր է հաղթել մնացած երկու տուրերում:

Հայաստանի 20-ամյա շախմատիստուհի Մարիա Գեւորգյանն այսօր նույնպես պարտություն կրեց աշխարհի երիտասարդական առաջնությունում: 11-րդ տուրում մեր միակ ներկայացուցիչն այդ մրցաշարում սեւ խաղաքարերով զիջեց լեհ Աննա Իվանովին: Մարիա Գեւորգյանը չկարողացավ շարունակել նախորդ երկու տուրերի հաղթարշավը եւ մնաց 6,5 միավորով: Դա նշանակում է, որ մեր շախմատիստուհին զրկվեց մրցանակային տեղ զբաղեցնելու հնարավորությունից, քանի որ առաջնության ավարտից երկու տուր առաջ մոտ 10 մասնակիցներ նրան գերազանցում էին մեկ միավորով, իսկ դա նշանակում է, որ նրանց մոտ կեսը մեքենայաբար կմնան առաջին դիրքերում: