Կարեն Կարապետյանը ՀՀԿ-ին անդամակցելու դիմում է ներկայացրել

«Երեկ ՀՀ կառավարության նիստի ժամանակ վարչապետ Կարեն Կարապետյանը հայտարարեց, որ ՀՀԿ-ին անդամակցելու դիմում է ներկայացրել ու նշեց 7 պատճառ, թե ինչու: Նախ՝ որովհետև իրեն վարչապետի պաշտոնին «հրավիրել է» ՀՀԿ նախագահ Սերժ Սարգսյանը, որ ցանկացած կառավարություն պետք է ունենա քաղաքական հենարան և այս կառավարությունը ՀՀԿ-ի կառավարությունն է:

Պարզաբանելով, թե ինչու ինքը չի ստեղծել մեկ այլ կուսակցություն որպես, քաղաքական հենարան, վարչապետն ասաց. «Ունենալով Արցախի հիմնահարց և մեր երկրի անվտանգությանն ուղղված սպառնալիքներ՝ մենք պետք է խուսափենք հնարավոր բոլոր դեստաբիլիզացիոն գործընթացներից և զարգացումներից»:

Բացի այդ ՀՀԿ-ն կարող է լինել փոփոխությունների քաղաքական հենարան, քանի որ պահպանողական կուսակցություն է «Անհրաժեշտ է շատ բան փոխել տնտեսական-սոցիալական կյանքում, առավել ևս պետական կառավարման համակարգում, ինչը նշանակում է, որ փոփոխությունները պետք է սկսենք մեզանից: Այս հարցը ՀՀԿ-ում շատ հստակ է դրված՝ խոսակցությունները ներսում շատ բաց են և անկեղծ, իսկ ինքնաքննադատությունը շատ դեպքերում ավելի սուր է, քան պատկերացնում են դրսից»,-ասել է նա:

Ներկայումս կառավարությունում կա 9 անկուսակցական՝ մշակույթի նախարար՝ Արմեն Ամիրյանը, պաշտպանության նախարար՝ Վիգեն Սարգսյանը, տնտեսական զարգացման և ներդրումների նախարար Սուրեն Կարայանը, էներգետիկայի և բնական պաշարների նախարար Աշոտ Մանուկյանը, առողջապահության նախարար Լևոն Ալթունյանը, գյուղնախարար Իգնատի Առաքելյանը, սպորտի և երիտասարդության հարցերի նախարար Հրաչյա Ռոստոմյանը, տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը: Անկուսակցական է նաև Կարեն Կարապետյանի վստահելի պաշտոնյաներից ՊԵԿ նախագահ Վարդան Հարությունյանը: Վիգեն Սարգսյանը ՀՀԿ-ի անդամակցելու դիմումը երեկ արդեն գրել էր»,–գրում է թերթը։

Մանրամասները՝ Հայկական ժամանակ թերթի այսօրվա համարում։