Կարեն Կարապետյանը լուրջ անձնավորություն է, և հաստատ հաշվարկել է իր քայլերը

Մի քանի օր է, ինչ մամուլում ակտիվ քննարկումներ են գնում ՀՀ վարչապետ Կարեն Կարապետյանի արած այն հայտարարության վերաբել, համաձայն որի, նա ասել էր, որ ՀՀԿ անդամագրվելով իր վարկանիշն ընկել է: Անդրադառնալով վարչապետի հայտարարությանը` ԱԱԾ նախկին պետի տեղակալ Գուրգեն Եղիազարյանն այն համոզմունքին է, որ Կարեն Կարապետյանն իրոք Հանրապետական կուսակցություն մտնելով հարված հասցրեց արդեն իսկ իր ձեռք բերած վարկանիշին:

Նա Fnews.am-ի հետ զրույցում նկատեց, որ այս երկար ու ձիգ տարիների ընթացքում ՀՀԿ-ն եկել հասել է մի կետի, որտեղից այն կողմ պարզապես «էլ տեղ չկա…»: Թեև մյուս կողմից էլ ԱԱԾ նախկին պաշտոնյան դեռևս մեծ ակնկալիքներ է կապում Կարեն Կարապետյանի հետ: Նրա դիտարկմամբ` դրական փոփոխություններն ակնառու են: Որպես այդպիսիք` Գուրգեն Եղիազարյանը մատնանշում է վարչապետի հայտարարությունն այն մասին, որ ցանկացած մարդ կարող է ապրանք ներկրել Հայաստան: «Սա արդեն իսկ դրական արդյունք է. այսօր արդեն մի շարք ապրանքներ են ներմուծվում երկիր, այլ ներկրողների միջոցով և գները նվաղում են…»,-ասում է Գուրգեն Եղիազարյանը:

Դիտարկմանը, թե կուսակցական շրջանակը կարող է սեղմել վարչապետի հնարավորություններն ու որոշակի կաղապարի մեջ դնել նրան գործունեությունը, նախկին պաշտոնյան նկատեց, որ այսպես, թե այնպես արդեն իսկ նրա վրա ճնշում գործադրում են: «Իրենք հիմա էլ խանգարում են, նրանք իրենց չար գործը պետք է կատարեն… և կատարում են»,-ասաց Գուրգեն Եղիազարյանը:

Նա այնուամենայնիվ ուզում է հավատալ, որ Կարաեն Կարապետյանը կբերի այն փոփոխությունը, առանց որի մենք կկորցնենք մեր հայրենիքը: Նա դժվարանում է պատասխանել հարցին, թե որքանով էր անհրաժեշտ վարչապետին անցնել կուսակցության շարքերը, և ինչու առանց կուսակցական դառնալու չէր կարող շարունակել իր գործը: Գուրգեն Եղիազարյանի գնահատմամբ` Կարեն Կարապետյանը լուրջ անձնավորություն է, և հաստատ հաշվարկել է իր քայլերը, իսկ խնդրի շուրջ կարծքիները, ըստ նրա, կարող են միայն ելնել ենթադրություններից, որը ԱԱԾ նախկին պաշտոնյան հարկ չհամարեց հայտնել: