Կենտրոնում՝ խաղահրապարակի կողքը ինչ-որ թափոնների անհասկանալի կառույց է ստեղծվում․ Թեհմինա Վարդանյան

Կենտրոնում՝ Վարդան Մամիկոնյանի արձանի հարակից այգում վերջին օրերին մեծ տեխնիկա է աշխատում եւ տարածքը ասֆալտապատվում է։ Այս մասին այսօր՝ փետրվարի 11-ին, Երեւանի ավագանու նիստին հարց ուղղեց «Լույս» խմբակցության անդամ Թեհմինա Վարդանյանը։

«Վարդան Մամիկոնյանի արձանի հարակից այգում, որտեղ կա խաղահրապարակ, խոսքը Խանջյան եւ Երվանդ Քոչար փողոցների արանքում ընկած այգու մասին է, չեմ ասում պատմամշակութային արժեք, տակը Գետառն է, բավականին մեծ խաղահրապարակ կա, եւ առհասարակ այգի է, վերջին օրերին մեծ տեխնիկա է աշխատում, եւ տարածքը ասֆալտապատվում է, խոսակցություններ են պտտվում, որ այդ տարածքում մեր վերջին վեճի՝ վտանգավոր թափոնների հետ կապված ինչ-որ բան է կատարվում։ Եթե այդպես է, ապա ճիշտ եք գտնում այգում, խաղահրապարակի տարածքում․․․ ի՞նչ տեխնիկա է աշխատում, ինչո՞ւ է բետոնապատվում եւ նպատակը ո՞րն է»,-հարցրեց Վարդանյանը։

Հարցին պատասխանեց Կենտրոն վարչական շրջանի ղեկավարն է Ավետ Պողոսյանը։

«Ըստ ամենայնի խոսքն այն մասին է, որ այդտեղ նախապատրաստական աշխատանքներ են տարվում նոր ստեղծվող «Կանաչապատման» ՀՈԱԿ-ի կազմում գործող տեսակավորված աղբի համար, ոչ թե վտանգավոր աղբի մասին է խոսքը»,-նշեց նա։

Քաղաքապետ Հայկ Մարությանը մասնավորեցրեց՝ այսինքն արդիականացվում, կարգավորվում է «Կանաչապատման» ՓԲԸ-ի տարածքը, որին թաղապետը դրական պատասխանեց։

Թեհմինա Վարդանյանը հակադարձեց․ «Ոչ։Ես այդպես չհասկացա, ներողություն եմ խնդրում պարոն Մարության։ Այսինքն եւս մեկ անգամ փաստում ենք, որ Կենտրոնում՝ այգու մեջ, խաղահրապարակի կողքը ինչ-որ թափոնների կամ թեկուզ կանաչապատում բառը չի քաղարկելու այն, ինչ այնտեղ կատարվում է, որովհետեւ դա այլեւս կանաչապատ տարածք չի լինելու, թեկուզ մեկ սանտիմետր, այսինքն այգում՝ խաղահրապարակի կողքը, պատմամշակույթին արժեքի կողքը եւ Գետառի վերեւում գործելու է ինչ-որ անհասկանալի կառույց է ստեղծվում։ Սրան նորմա՞լ եք վերաբերում»։

Մարությանն ասաց, որ տեղյակ չէ, երբ կտեղեկանա, կարծիք կհայտնի։