Կհաղթի նա, ով համեմատաբար քիչ սխալներ թույլ կտա

«AllBoxing»-ը տեղեկացնում է, որ նոյեմբերի 9-ին ԱՄՆ Տեխասի նահանգում վերջապես կայանալու է աշխարհի նախկին բացարձակ չեմպիոններ Վախթանգ Դարչինյանի եւ ֆիլիպինցի Նոնիտո Դոների միջեւ ռեւանշ մրցամարտը, որը հեռարձակելու է HBO հեռուստաալիքը: Հիշեցնենք, որ բռնցքամարտիկների առաջին եւ միակ մենամարտը կայացել է 2007 թվականի հուլիսին, երբ ֆիլիպինցին 5-րդ ռաունդում հաղթեց մեր հայրենակցին: Դա, ի դեպ, Վախթանգի առաջին պարտությունն էր պրոֆեսիոնալ կարիերայում: Պարտությունից հետո Վախթանգը բազմիցս ռեւանշի է հրավիրել Դոներին, սակայն վերջինս ինչ-ինչ պատճառաբանություններով խուսափում էր մենամարտից: Ավելորդ չենք համարում նաեւ հավելել, որ Վախթանգն արդեն 37 տարեկան է, իսկ Դոները` 30:

Այդ ընթացքում IBF, WBC , WBA վարկածներով աշխարհի չեմպիոն Վախթանգ Դարչինյանը շատ էր քննադատել Նոնիտոյին վախկոտության  համար ու դեռեւս տարեսկզբին ասել էր. «Նոնիտո Դոները ցույց տվեց, որ չի պատրաստվում ինձ ռեւանշի հնարավորություն տալ եւ ապրիլի 13-ին մենամարտելու է Գիլյերմո Ռիգոնդոյի հետ: 2007-ին Նոնիտոյի բախտը բերեց, բայց 2013-ին այլ կերպ կլինի: Թող ապացուցի, որ չի վախենում ինձնից: Երբ ես դարձա բացարձակ չեմպիոն, նրան հրավիրեցի մենամարտի, իսկ նա ասաց, որ արդեն հաղթել է ինձ եւ նորից մենամարտելու պատճառ չի տեսնում: Բայց երեք գոտին ծանրակշիռ պատճառ է: Հանդիպիր ինձ հետ եւ ապացուցիր, որ հավի ճուտ չես»:

Ապրիլի 13-ին WBO վարկածով աշխարհի չեմպիոն, ֆիլիպինցի Նոնիտո Դոները պարտվեց սուպերմիջին քաշային կարգում WBA վարկածով աշխարհի չեմպիոն կուբացի Գիլյերմո Ռիգոնդոյին եւ զրկվեց չեմպիոնական գոտուց:

Վախթանգը պետք է մենամարտեր մեքսիկացի Վիկտոր Տերրասասի հետ, սակայն վերջինս մենամարտեց իր հայրենակից Լեո Սանտա Կրուսի հետ, պարտվեց եւ կորցրեց WBC վարկածով առաջին կիսամիջին քաշային կարգում աշխարհի չեմպիոնի տիտղոսը: Փաստորեն, բավականին երկար ժամանակ մեր հայրենակիցը ռինգ դուրս չի եկել, իսկ դա, բնական է, կարող է բացասական ազդեցություն ունենալ առաջիկա մենամարտի ելքի վրա: Ինչ որ է, մենք չցանկացանք եզրակացություններ անել եւ մասնագիտական կարծիք իմանալու համար դիմեցինք Վախթանգի առաջին մարզիչ Վազգեն Բադալյանին: Նախ տեղեկացանք, որ մոտ երկու շաբաթ առաջ Վախթանգը գտնվում էր Հայաստանում, քանի որ մահացել էր հորեղբայրը: Նա Ավստրալիայից Դուբայով եկել էր Երեւան, հետո մեկնել ԱՄՆ: Ապա մարզիչը հավելեց.

-Մեքսիկացի Վիկտոր Տերրասասի հետ պետք է մենամարտեր, ով  նաեւ աշխարհի չեմպիոնի տիտղոս ուներ, բայց երեւի պրոմոութերները համաձայնության չեկան… Երեւի շահերը չհամընկան: Մենամարտի չկայանալը վատ էր Վախթանգի համար, որովհետեւ բավականին ժամանակ մենամարտ չի անցկացնում: Ի դեպ, Դոները վերջերս կորցրեց չեմպիոնական տիտղոսը, կուբացի Ռիգոնդոյին պարտվեց, ով օլիմպիական կրկնակի չեմպիոն է, տաղանդավոր տղա, պարտություն չունի, 12 ռաունդ մենամարտեցին, շատ գեղեցիկ մենամարտ էր: Ռիգոնդոն չկռվեց, ավելի շատ շարժվեց եւ մշտական հարվածներով, տեղաշարժերով Դոներին հաղթեց: Չնայած Դոները մի անգամ նոկդաունի ենթարկեց մրցակցին, բայց շատ մեծ տարբերությամբ Ռիգոնդոն հաղթեց` խլելով  Դոների տիտղոսները: Վախթանգի հետ մենամարտը լինելու է երկու ուղղությամբ. մեկը իրենց հին հաշիվները մաքրելու խնդիրն է, մյուսը, ամենակարեւորը, հաղթողն արդեն իրավունք ունի մենամարտելու Ռիգոնդոյի հետ, այսինքն`դառնում է չեմպիոնի տիտղոսի հավակնորդ:

Դոների հետ մենամարտը Վախթանգի համար ծանր կլինի. Դոների տեխնիկական որակները շատ բարձր են, ոճային առումով էլ Վախթանգից մի քիչ բարդ տղա է, որովհետեւ ոտքերի վրա շատ լավ շարժվում է, ուժեղ ձախ կողային հարվածներ ունի, շատ բարձրահասակ է, միշտ աշխատում է հակառակորդին տարածության վրա պահել: Դոները լավ գիտի, որ մերձամարտի ժամանակ կտուժի, որովհետեւ Վախթանգն ավելի ակտիվ է եւ ուժեղ խփում է… Կհաղթի նա, ով  համեմատաբար քիչ սխալ թույլ կտա, որովհետեւ ինքնագլուխ, հանպատրաստից կամ երկկողմանի մերձամարտի ժամանակ չես կարող ասել` ինչ կլինի:

Մենք զանգահարեցինք ԱՄՆ` Վախթանգին, սակայն, ցավոք, ժամանակային գոտիները խառնել էինք: Վախթանգն արթնացավ մեր հեռախոսազանգից եւ ընդամենն ասաց.

-Մարզումները, նախապատրաստական աշխատանքները նորմալ են ընթանում, որեւէ խանգարող հանգամանք չկա: Մի քանի օրից ասուլիս եմ կազմակերպելու եւ կասեմ որոշ մանրամասներ:

Եգոր ՄԱՆՈՒԿՅԱՆ