Կլասիկ ընդդիմություն ես չեմ համարում այն ուժերին, որոնք սկսում են առեւտուր անել իշխանությունների հետ

Մի քանի  օր է, ինչ քաղաքական քառյակը հրապարակել է 12 կետից բաղկացած պահանջները: Տվյալ ուժերի կողմից բարձրացված խնդիրները նոր չեն, դրանք պարզապես ժամանակին քառյակի սրտով հանգուցալուծում չեն ստացել: Վերոնշյալ կետերի եւ քաղաքական զարգացումների մասին, Fnews.am-ը զրուցեց ԱԺ ՀՀԿ խմբակցության պատգամավոր Համլետ Հարությունյանի հետ.
-Որքանո՞վ են իրատեսական քառաքական քառյակի կողմից ներկայացված պահանջները ու դրանց լուծումները:
-Կապրենք կտեսնենք, թե որքանով են հավանական դրանց լուծումները: Ես դրա հեղինակը չեմ ու ոչ էլ պատասխանատուն:
-Իսկ Դուք տեղյա՞կ եք ինչի մասին է խոսքը գնում, ծանոթացե՞լ եք նրանց պահանջներին:
-Իշխանական թեւի ներկայացուցիչները պնդում են, որ որոշ առաջակրներ ընդունելի են, բայց ընդունելի չէ ուլտիմատումի ձեւը: Ես անձամբ մանրամասն չեմ կարդացել, ուղղակի ծանոթ եմ պահանջներին: Կարիք էլ չկա կարդալու, դա պարզապես իրենց գործունեության արդյունքն է՝ ավելի ամփոփ ձեւով:
-Ի՞նչ եք կարծում, նոր կառավարությունը հին պահանջներին ինչպե՞ս կարձագանքի:
-Նոր եւ հին կառավարության մեջ շատ մեծ տարբերություններ կան: Հենց միայն նա, որ վարչապետն ասել է, որ պետք է ականջալուր լինել ընդդիմությանը եւ այն պահանջներին, որոնց մեջ ռացիոնալ հատիկ կա, արդեն դրական քայլ է: Կարծում եմ, որ նոր վարչապետը ընդդիմության հետ ավելի ճկուն ու թափանցիկ է աշխատում եւ այդ համագործակցությունն, ինձ թվում է` իր արդյունքները կտա:
-Նոր վարչապետն այլ հայտարարություն էլ է արել՝ օլիգարխներին հարկային դաշտ մտցնելու հետ կապված, սակայն կարծես թե դեռ դրական տեղաշարժ չկան:
- Ժամանակ է հարկավոր, տեսնենք, թե ինչ է լինելու, մարդ մի բան է խոսում հաջորդ օրն արդեն դրա արդյունքն ենք պահանջում: Դեռ շատ քիչ ժամանակ է անցել հարցին լուծում տալու համար:
-Լավ, իսկ քառյակի վարած դիվանագիտությանն առհասարակ ինչպե՞ս եք վերաբերում:
-Ես դրա ջատագովը չեմ, ու կյանքս չեմ նվիրում քառյակի գործունեության ուսումնասիրությանը, ես իմ գործունեությունն եմ կատարում, նրանք ինձ այդքան էլ հետաքրքիր չեն, իրենց հարցերք իմ աշխատանքից, տեսնենք գոհ են, թե՞ դժգոհ: Քառյակը հարյուր տարի է գործում է, այդքան էլ դեռ կգործի, դա ինձ համար երկրորդական կամ տասերորդական հարց է: Քառյակի գործունեությունից դեռ որեւէ արդյունք չեմ տեսել:
-Իսկ հույսեր կա՞ն, որ արդյունքի կհասնեն:
-Ի՞նչ արդյունք: Ընդդիմությունը պետք է իշխանությունը վերցնի, այլ ոչ թե կետեր ներկայացնի: Ես միշտ ասել եմ, որ կլասիկ ընդդիմություն ես չեմ համարում այն ուժերին, որոնք սկսում են առեւտուր անել իշխանությունների հետ: Ես այդ առեւտուրը չեմ ընդունում: Ընդդիմությունը պետք է դնի ու մինչեւ վերջ ընդդիմություն մնա եւ չասի սա կկատարես ընդդիմություն չեմ մնա, նա կկատարես ընդդիմություն կմնամ եւ այլն: Ընդդիմությունը պետք է մի խնդիր ունենա՝ իշխանությունն իր ձեռքը վերցնելը, իսկ նման կերպով նրանք իշխանություն չեն կարող վերցնել:

Սոսե  Չանդոյան