Կոստյու՞մն է, որ պիտի զարդարի Յուվեցի Կարոյին

Comment

Մարդ կա՝ սկի Ֆիրդուսիից չի կարողանում իրեն հագուստ գնել, մարդ էլ կա՝ 12 հազար Եվրո արժողությամբ կոստյում է հագնում, բայց միևնույն է՝ ուզում է 50 հազար Եվրո արժողությամբ կոստյում հագնի՝ նրա տեսքը դրանից չի փոխվում, ոչ էլ բառապաշարն է փոխվում կամ ինտելեկտուալ մակարդակը բարձրանում: Հասկանալի է, որ խոսքը ԲՀԿ-ական Յուվեցի Կարոյի մասին է, որը շատ հանգիստ կարող էր Ֆիրդուսիից գնած 12 հազար դրամանոց կոստյումով էլ ման գալ, և դրանից նրա տեսքը չէր փոխվի: Բայց դե մարդը հավանաբար մի անգամ հաջողացրել և նայել էր «Հարսնացուն հյուսիսից» ֆիլմը, ոգեշնչվել էր Երվանդ Խրիստոֆորովիչի հայտնի «Կոստյումն է, որ քեզի պիտի զարդարե» արտահայտությամբ և դատարանում որոշել է անպայման շեշտել կոստյումի պահը՝ ցույց տալով իր առավելությունը հակառակորդի նկատմամբ, կարծես թե ասելով նրան՝ «իսկ դու կարո՞ղ ես 12 հազար եվրոյանոց կոստյում հագնել»:
Դե իհարկե, արժանիքները նրա համար են, որպեսզի դրանք ցույց տան, եթե մարդիկ համառորեն չեն ուզում նկատել: Իսկ եթե արժանիքը 12 հազար եվրոյանոց կոստյումն է, ապա այդ մասին պետք է նույնիսկ բարձրաձայնել: Միգուցե իսկապե՞ս կոստյումն է, որ պիտի զարդարի Յուվեցի Կարոյին:

Արտյոմ  Եդիգարյան