Կովալենկո Շահգալդյանն ու Սուրիկ Խաչատրյանը համառորեն պնդում են, որ...

«Դա լրագրողների ձեռքի գործն էր, միայն նրանք կարող էին նման սուտ տարածել»,-Fnews.am-ի հետ զրույցում անդրադառնալով մոտ 3 շաբաթ առաջ «Օջախ» ռեստորանային համալիրում տեղի ունեցած դանակահարությանը՝ ասաց Սյունիքի նախկին մարզպետ Սուրիկ Խաչատրյանը:

Հշեցնենք, որ ըստ շրջանառվող վարկածների, Խաչատրյանի որդին դանակահարել էր Կոտայքի նախկին մարզպետ Կավալենկո Շահգալդյանի թոռանը, ում շտապ տեղափոխել էին հիվանդանոց: Դեռ այն ժամանակ նախկին մարզպետները վստահեցնում էին, որ Սյունյաց մարզպետի որդին այս դեպքի հետ կապ չունի: Ավելին՝ Շահգալդյանի թոռը և Խաչատրյանի որդին ընկերներ են, բայց այդ ժամանակ Սյունիքի նախկին մարզպետի որդին այդտեղ չի եղել:

Հիմա էլ, Սուրիկ Խաչատրյանը վստահաբար հայտարարում է, որ նման ստահոդ լուրեր տարածելը ձեռնտու էր միայն լրագրողներին. «Միանշանակ դա լրագրողների ձեռքի գործն է, բայց կոնկրետ ո՞ւմ էր պետք. այ դա չեմ կարող ասել…»,- ասաց Սուրիկ Խաչատրյանը հորդորելով մեզ զբաղվել այդ «լրագրողի բացահայտման գործով»:

Ի դեպ, մեզ հետ զրույցում «Օջախ» ռեստորանային համալիրում տեղի ունեցած միջադեպին անդրադառնալով՝ Կավալենկո Շահգալդյանը ևս հորդորեց մեզ, որպես լրագրող հետաքննություն անցկացնել և պարզել, թե ում էր հարկավոր այս պատմության մեջ շոշափել Սուրիկ Խաչատրյանի որդու անունը՝ նշելով, որ դա իրեն ամենևին էլ չի հետաքրքրում: «Ա'յ, էդ դուք հետաքննեք, որպես լրագրող… ես դրան ուշադրություն չեմ դարձրել և նշանակություն չեմ տվել»,-ասաց Կոտայքի նախկին մարզպետը:
Հարցին, թե չի՞ պատրաստվում արդյոք Կավալենկո Շահգելդյանը վերադառնալ մեծ քաղաքականություն, վերջինս նկատեց. «Ի՞նչ է նշանակում վերադարձ… ես կուսակցությունում կամ, այսիքն ես քաղաքականության մեջ եմ…»,-ասաց նախկին պաշտոնյան՝ զարմանք հայտնելով, թե ինչու է հանկարծ իր հանդեպ նաման հետաքրքրություն առաջացել: Դիտարկմաը, որ նա պատահական մարդ չէ, որպեսզի չհետաքրքրի հանրությանը, Շահգալդյանը պատասխանեց. «Իհարկե լավ է, որ հետաքրքրում եմ, բայց կարծում եմ դրանք գործնական ամբիցիաներ են»: Նախկին մարզպետը չցանկացավ մեկնաբանել նաև քաղաքականության մեջ տեղի ունեցող վերջին զարգացումները:

Մասնավորապես անդրադառնալով ԲՀԿ հիմնադիր Գագիկ Ծառուկյանի վերադարձին, նա հորդորեց մի քիչ էլ համբերել, և հարցերի պատասխանները ստանալ հենց Ծառուկյանից: «Համբերե՛ք, Ծառուկյանը շուտով հանդես կգա հայտարարությամբ, և ամեն ինչ պարզ կլինի… Մեկնաբանելու կարիք չկա»,-ընդգծեց Կավալենկո Շահգալդյանը:

Հ.Գ Հուսանք, ժամանակը իրականում կտա բոլոր հարցերի պատասխանը, եւ նոր հարցադրումների տեղիք չի տա՝ երկրում ստեղծված քրեածին մթնոլորտի ու ամենաթողության հետ կապված:

Իսկ «Օջախ» ռեստորանային համալիրում տեղի ունեցած դանակահարությունը  մի տեսակ առեղծվածի տպավորություն է  թողնում: Գուցե նախկին ու ներկա պաշտոնյաների անունները կարող են տարաբնույթ պատմությունների հետ կապվել, քանի որ նրանիցից  թե' մեկի, եւ թե' մյուսի դեպքում միշտ էլ ինտրգային դաշտը մեծ է եղել, բայց որ Կոտայքի նախկին մարզպետ Կովալենկո Շահգալդյանի թոռան՝ Տիգրան Շահգալդյանի անունը երբեւէ քրեածին պատմությունների հետ չի կապվել, դա ակնհայտ է: Համենայդեպս, նրան ճանաչողներից շատերն են նշում, որ Տիգրան Շահգալդյանը իրականում դաստիարակված ու հավասարակշռված երիտասարդ է:

Ա. Սահակյան