«Կխնդրեի ու կհորդորեի, որ էդ անասունից հիշողության մեջ չջնջվող կերպար չսարքեն».Արագած Ախոյան

Նախօրեին Գյումրիում Ավետիսյանների ընտանիքի բոլոր անդամների դաժան սպանության գործով մոտ 4 ժամ տեւած դատական նիստի ընթացքում, մարդասպան Պերմյակովը ոչ մի անգամ գլուխը չբարձրացրեց, ամեն կերպ ջանում էր դեմքը թաքցնել ներկա գտնվողներից: Միայն դատավորի հարցերին պատասխանելիս նա ոտքի էր կանգնում, հարցերին տալիս այո կամ ոչ պատասխանը եւ կրկին նույն դիրքով նստում: Սպանված Հասմիկ Ավետիսյանի քույրն էլ ՝ Ռիտա Պետրոսյանը, Պերմյակովին տեսնելով, չկարողացավ զսպել էմոցիաները. «Սվոլըչը, նիգադյայը... ինչի՞ եք բերել դրան ստեղ, տարեք հրապարակ, գյուլլե՛ք: Հիմա քրոջս տունը պիտի տոնածառ դնեին, ամանոր անեին, էս ի՞նչ արեց մեր հետ էս սվոլըչը... Սրսկել, բերել, քցել են էդտեղ »,- բղավում էր սպանվածի քույրը: Տիկին Ռիտան իր բողոքի ձայնն էր բարձրացրել նաեւ այն առթիվ, որ դատական նիստն անցկացվում է ռուսական ռազմաբազայում, եւ ոչ թե հայկական դատարանում:

Թե ո՞ւր կհասնի Ավետիսյանների սպանության գործը, եւ թե ի վերջո հայտնի կդառնա՞, թե իրականում ինչից դրդված էր  Պերմյակովը իրակացրել  այդ արյունոտ սպանդը, Fnews.am-ը հարցադրում արեց ԱԺ պատգամավոր Արագած Ախոյանին, ով մեզ հետ զրույցում ասաց.

-Ինձ համար արդեն մեկ է, թե նա ինչ ազգություն ունի: Նա ոճրագործություն է կատարել, եւ ես չեմ ասում, որ եթե նրա արարքը ազգությամբ հնդիկը կատարած լիներ, կարող էր ինչ-որ կերպ մեղմացնել այդօրինակ տականքի արարքը: Այնպես որ այստեղ ազգությունը կապ չունի: Իզուր են շահարկում, իզուր են ժամանակ ծախսում, եւ կրքեր շիկացնում, թե ով կդատվի: Ի՞նչ տարբերություն, թե ով կդատվի, ուղղակի մեր լրագրողներին էլ շատ կխնդրեի, ու կհորդորեի, որ էդ անասունից հիշողության մեջ չջնջնվող կերպար չսարքեն: Եւ նրա նկարները հնարավորինս քիչ զետեղեն կայքերում, ու թերթերում, որովհետեւ երկու տող գրվում ա էդ անասունի մասին, բայց կես էջով դրվում է  դրա նկարը: 

-Գուցե այդկերպ  Պերմյակովի կերպարը ցցում են՝ որպես հանցագործի:

-Էս անասունին տեսնելը ամեն անգամ զայրույթի ու զզվանքի տեղիք է տալիս: Ինչի՞ են էդքան դրա նկարները տիրաժավորում, չեմ հասկանում:

-Պարոն Ախոյան այնուամենայնիվ  հավատում ե՞ք, որ կկայանա արդար դատավարություն:

-Իհարկե հավատում եմ, իսկ ինչի՞ պիտի չկայանա: Հանցագործությունը՝ ազգություն չի ճանաչում. այսօր նման տականքը, որ ազգից էլ որ լինի, կստանա իր արժանի պատիժը: Եթե նրա արարքի մեջ որեւէ միտում նկատվեր, կամ դրա հետեւում  ուժեր կանգնած լինեին, մենք կարող էինք մի տեղ կասկածել, որ գուցե ինչ-որ բան այն չի լինի... Բայց էդ անասաունը՝ հոգեկան շեղվածությամբ  տականք է, ում պետք չի դարձնել հիթ  ու շպրտել նրա լուսանկարները ողջ համացանցում: Մենք պարզապես պետք է անընդհատ պահանջեք եւ ուշադիր լինենք, որպեսզի այստեսակ ստահակի արարքը պատժվի  օրենքի խստագույն տառով: