«Կյանքի խոսքը» կրոնակա՞ն, թե՞ վիրավորանք եւ զրպարտություն տարածող էժանագին կառույց

Երեւան քաղաքի ընդհանուր իրավասության դատարանում շարունակվում է քննվել «Իրավունք Մեդիա» ՍՊ ընկերության հայցն ընդդեմ  «Հայաստանի ավետարանական հավատքի քրիստոնյաների «Կյանքի խոսք եկեղեցի» կրոնական կազմակերպության եւ Արմեն Էդուարդի Լուսյանի` ներողություն խնդրելուն, զրպարտություն համարվող տեղեկությունները հերքելուն պարտավորեցնելու և փոխհատուցում բռնագանձելու պահանջների մասին գործով դատավարությունը:

Քննվում է արժանապատվության և գործարար համբավի հարցը, որի կրողը լրատվամիջոցն է:

Մասնավորապես,  պատասխանող «Հայաստանի ավետարանական հավատքի քրիստոնյաների «Կյանքի խոսք» եկեղեցի կրոնական կազմակերպությունը իրեն պատկանող www.facebook.com կայքի պաշտոնական էջում 19.06.2020 թվականին տպագրել է «Իրավունք Մեդիա» ՍՊ ընկերության /և վերջինիս էլեկտրոնային կայքի մասին «Կյանքի Խոսքն»  ընդդեմ «Իրավունք» աղանդավորական կայքի» վերնագրով հոդված, որով վիրավորանքի և զրպարտության միջոցով արատավորել է Հայցվոր «Իրավունք Մեդիա» ՍՊ ընկերության պատիվն, արժանապատվությունը և գործարար համբավը:

Նկատենք, որ դատարանում «Իրավունք Մեդիա» ՍՊ-ի շահերը  ներկայացնում է «Լեւ Գրուպ» փաստաբանական ընկերությունը` ի դեմս փաստաբան ԼԱՐԻՍԱ ԲԱՂԴԱՍԱՐՅԱՆԻ, այսօրվա դատական նիստին ներկա էր նաեւ ընկերության հիմնադիր ղեկավար, մի շարք աղմկահարույց գործերով հայտնի փաստաբան ԼԵՒՈՆ ԲԱՂԴԱՍԱՐՅԱՆԸ:

Այսօրվա դատական նիստի ընթացքում, որպես վկա հարցաքննվեց պատասխանող Արմեն Էդուարդի Լուսյանը, ընդ որում վերջինիս հարցաքննելու միջնորդությունը կատարվել էր հենց պատասխանողի կողմից: Դատական գործընթացի ընթացքում վերջինս փորձեց դատարանին վստահեցնել, որ ինքը չի ցանկացել ո՛չ վիրավորել, ո՛չ զրպարտել հայցվոր կողմին: Միեւնույն ժամանակ ընդգծելով, որ իր կողմից արված հայտարարությունները եղել են ցնցող, բայցեւայնպես չի ցանկացել վիրավորել: Իսկ, որպես պատճառաբանությունը նշեց, որ պատճառը, ըստ իր խոսքերի, տեւական ժամանակ «Իրավունք Մեդիա» ՍՊ-ի կողմից իբրեւ թե իրենց առեւերույթ իրավունքը ոտանահարելն է` վերջիններիս ներկայացնելով, որպես աղանդավորական կազմակերպություն:

Որից հետո հայցվորի ներկայացուցչի` Լարիսա Բաղդասարյանի կողմից հարց հնչեց պատասխանողին, մասնավորապես հետաքրքրվելով, որ եթե իրենք գտել են, որ առերեւույթ խախտվել է իրենց իրավունքը, ապա ինչո՞ւ չեն դիմել դատական պաշտպանության կամ հերքման պահանջով հանդես չեն եկել: Ինչին ի պատասխան, վերջինս պատասխանեց, որ իրենք փորձել են իրենց ինքնապաշտպանությունը իրականացնել այլ եղանակներով, այդպես էլ չբացահայտելով, թե ինչ այլ եղանակներով:

Հատկանշական էր, որ դատական նիստի ընթացքում պատասխանող կողմի ներկայացուցիչը ակնհայտ փորձեց խախտել հավասար մրցակցության դաշտը` փորձելով ապացույցների հետազոտումից հետո ` հետ գնալ եւ ներկայացնել հայցի դեմ առարկությունները, ինչը իրավամբ նախագահող դատավորի կողմից կանխվեց: Մեր, ինչպես նաեւ նիստը նախագահող դատավորի աչքից չվրիպեց նաեւ պատասխանող կողմի ներկայացուցչի, մեղմ ասած, քամահրական, անհարգալից` պարբերաբար ձայնի տեմբր բարձրացնող պահվածքը, վարվելակերպը, դիմելաձեւը դատարանին: Ինչը անթույլատրելի է:

Ուշագրավ է նաեւ,  որ վերջիններս տարիներ առաջ մտել էին դատական պաշտանության ընդդեմ «Իրավունք Մեդիայի»` միայն նրա համար, որ «Իրավունք Մեդիան» «Կյանքի խոսքին» ասել էր աղանդավորական կազմակերպություն: Եվ դեռեւս տարիներ առաջ Վեհափառը իր պաշտոնական գրությունով փաստել էր, որ բոլոր այն կրոնական կազմակերպությունները, ովքեր շեղվում են Հայ Առաքելական եկեղեցու կանոններից, այ՛ո իրենք աղանդավորական են: Ի դեպ, վերոգրյալի վերաբերյալ կա կայացված դատական ակտ, իսկ Վեհափառի գրությունը երբեւիցէ չի վիճարկվել: Եվ նման պարագայում առնվազն տարօրինակ է ,որ պատասխանող կողմը հիմա որոշել է վիրավորվել աղանդավորական բառից:

Դատական նիստից հետո «Լեւ Գրուպ» փաստաբանական ընկերության հիմնադիր ղեկավար Լեւոն Բաղդասարյանը «Իրավունքի» հետ  զրույցում փաստեց հետեւյալը.

-Կրոնական կազմակերպությունը օրինակ պետք է ծառայի երկրում ատելության խոսքը արմատախիլ անելուն, եւ ոչ թե իրենք լինեն ջատագովը` վիրավորելու, զրպարտելու:

Սույն գործով վճիռը կհրապարակվի հունիսի 28-ին:

ԻԼՈՆԱ ԱԶԱՐՅԱՆ

Iravunk.com