ԿԸՀ-ն հրապարակել է ապրիլի 17-ի ՏԻՄ ընտրությունների արդյունքները

Կենտրոնական ընտրական հանձնաժողովը հրապարակել է երեկ բազմաթիվ համայնքներում տեղի ունեցած տեղական ինքնակառավարման մարմնի ընտրությունների արդյունքները: Ներկայացնենք ամենախոշոր համայնքների արդյունքները: Այսպես, Հրազդանում ՀՀԿ անդամ, Հրազդանի գործող քաղաքապետ Արամ Դանիելյանը ստացել է 12510 ձայն, Քաղաքացիական պայմանագրի անդամ Սասուն Միքայելյանը` 10267 ձայն, իսկ Հայկական վերածնունդի անդամ, Արթուր Բաղդասարյանի նախկին մամուլի խոսնակ Արթուր Միսակյանը` 1237 ձայն, անվավեր քվեաթերթիկները 813 են: 44 338 ընտրողից քվեարկությանը մասնակցել էր 24 861-ը:
Թալինում քաղաքապետ դառնալու համար պայքարում էին երեք թեկնածու՝ ներկայիս գործող քաղաքապետ ՀՀԿ անդամ Սարգիս Արամյանը, ով ստացել է 1993 ձայն, «Հայկական վերածնունդ» կուսակցության անդամ Գուրգեն Գրիգորյանը` 168 ձայն եւ ՀՅԴ կողմից առաջադրված Տիգրան Հարությունյանը` 1036 ձայն: Ընտրողների ընդհանուր թիվը 5 296 է, որոնցից մասնակցել էր 3 305: Անվավեր քվեաթերթիկները 70-ն էին:
Մյուս խոշորր համայնքում` Սպիտակում եւս հաղթել է գործող քաղաքապետ, ՀՀԿ անդամ Գագիկ Սահակյանը` ստանալով 4463 ձայն, իսկ Լոռու փոխմարզպետ, նույնպես ՀՀԿ-ական Վանիկ Աատրյանը ստացել է 2933 ձայն, անվավեր քվեաթերթիկները 260-ն էին: Այստեղ 13 278 ընտրողից քվեարկությանը մասնակցել է 7 661-ը: