Լավ է ուշ, քան երբեք. Էդմոն Մարուքյանը՝ խոշտանգումների համար պատիժը խստացնող օրենքի ընդունման մասին

Քրեական օրենսգրքում և Քրեադատավարական օրենսգրքում լրացումներ և փոփոխություններ կատարելու մասին օրենքի նախագծի փաթեթը, որով առաջարկվում է խստացնել խոշտանգման համար պատիժները, ավելի լավ է ուշ ընդունվի, քան՝ երբեք:

Հարցի քննարկման ժամանակ այս մասին հայտարարեց օրենսդրական փաթեթի հարակից զեկուցող Էդմոն Մարուքյանը՝ հավելելով, որ այս օրենքը պետք է ընդունվեր վաղուց:

«Ես կառաջարկեի, որ այս օրենքում ավելացվեր, որ այն անձինք, ովքեր դատապարտվել են խոշտանգման համար, նրանց վրա երբեք չտարածվի համաներումը»,-ասաց պատգամավորը:

Հիշեցնենք, որ այս նախագծով փորձ է արվում լուծել պրակտիկայում պաշտոնատար անձանց կողմից խոշտանգումների համար քրեական պատասխանատվության առաջադրումը հենց խոշտանգման մասին հոդվածով, այլ ոչ թե նման դեպքերում պաշտոնատարներին առաջադրվող 309-րդ՝ պաշտոնական դիրքի չարաշահմանը վերաբերող հոդվածով:

Փաստորեն, ըստ գործող օրենսդրության՝ խոշտանգման մասին հոդվածը կարող է առաջադրվել միայն ֆիզիկական անձանց, իսկ պաշտոնատար անձանց նման դեպքերում առաջադրվում է ՔՕ 309 հոդվածը (պաշտոնական դիրքի չարաշահումը, որը զուգորդվել է բռնությամբ), որը շատ ավելի մեղմ պատիժ է նախատեսում:

Երեկ հարցի քննարկումը ավարտվել էր հիմնական զեկուցող՝ արդարադատության փոխնախարար Արման Թաթոյանին հարց ուղղելու փուլում:

Մասնավորապես հանրապետական Կորյուն Նահապետյանին հետաքրքրում էր, թե պաշտոնատար անձանց շրջանակը ի՞նչ չափանիշով պետք է սահմանվի, ինչի ի պատասխան Արման Թաթոյանն ասաց, որ ձևակերպումը վերցված է միջազգային փորձից, «Խոշտանգումների դեմ» կոնվենցիայից՝ «բոլոր այն անձինք , որոնք հանդես են գալիս պետության անունից»:

Նշենք, որ նախքան օրենքի ընդունումը կազմակերպվեց մի շարք նախագծերի քվեարկություն, որոնց բոլորի վերաբերյալ «Հայ ազգային կոնգրես» խմբակցության ղեկավար Լևոն Զուրաբյանը հայտարարեց, որ դեմ են քվեարկելու:

Ի պատասխան՝ ԱԺ նախագահը հայտարարեց. «Աչքներս լույս, քվեարկություն»:

Իսկ երբ պատգամավորները սկսեցին դահլիճից դուրս գալ, Գալուստ Սահակյանն առաջարկեց. «Ավելի լավ է՝ նստեք, աղմկեք, քան աղմկելով գնալ»: