Լրագրողներին շատ բաներից արժե զրկել. Նախկին լրագրող, այսօր իշխանական պատգամավոր Հայկ Գեւորգյան

<<Լրագրողներին շատ բաներից արժե զրկել, որովհետեւ լրագրողները ազատությունը խառնել են սանձարձակության հետ: Ամեն ինչ չափ ու սահման պետք է ունենա, էսօրվա լրագրողների մեծ մասը չափ ասածը չգիտի, թե որն է>>,-<<Իրավունքի>> հարցին, թե ի՞նչով է պայմանավորված ԱԺ-ում լրագրողների մուտքի սահմանափակումները, այսպես պատասխանեց <<Իմ քայլը>> խմբակցության պատգամավոր, նախկին լրագրող Հայկ Գեւորգյանը, ապա փորձելով մեղմել ասվածը հավելեց.

-Հասկացեք, պատերազմի ժամանակ, ռազմական դրության ժամանակ էնքան բաց ինֆորմացիաներ տվեցիք, որ թշնամին տեղը տեղին սաղ տեղեկացվեց: Պետք է ինֆորմացիան որոշակի ֆիլտրացում անցնի, ոչ թե ով ինչ հասնի գրի, առանց մտածելու, որ պետական գաղտնիքի հետ կարող ենք գործ ունենալ:

-Փաստորեն լրագրողներն էին մեղավոր, որ թշնամին Արցախի կեսը գրավեց:

-Լրագրողները առանց ճշտելու ինֆորմացիաներով նպաստում էին թշնամու գործողություններին: Ես Ձեզ կարող եմ բազմաթիվ դեպքեր ասել:

-Օրինակ, կասե՞ք, ես կամ մեր լրատվամիջոցը ինչ պետական գաղտնիք ենք հրապարակել, որից հետո թշնամին ինչ-որ գործողություն է սկսել:

-Ես դա ընդհանրական եմ ասում, ասում եմ ու էլի կասեմ, լրագրողները պետք է իրենց չափերը ճանաչեն:

-Այո, համաձայն եմ, բայց չափ ցույց տվեք նրանց, ովքեր այդ չափերից դուրս են գալիս, ոչ թե բոլորին սահմանափակեք: Դուք ինքներդ եք եղել նախկին լրագրող, ու լրագրողների մասին այս կերպ խոսելը, առնվազն տարօրինակ է:

-Ես որ լրագրող էի մենք պահպանում էինք պարկեշտության բոլոր կանոնները: Իսկ այն ինչ հիմա է կատարվում ուղղակի խայտառակություն է բառի բուն իմաստով:

- Դուք էլի ընդհանրական եք խոսում, կոնկրետ ցույց տվեք մի դեպք, երբ ինքս խախտել եմ պարկեշտության կանոնները:

-Այ, որ բոլորին իրենց չափը ցույց տանք, ամեն ինչ իր տեղը կընկնի: Ձեզ կոնկրետ ոչինչ ասել չեմ կարող, բայց...

-Բայց ինչ:

-Լրագրողների աշխատանքը պետք է կանոնակարգվի, վերջ, ես ավարտեցի, ցտեսություն:

-Բայց ես չավարտեցի:

-Դա Ձեր խնդիրն է:

-Ոչ, Ձեր խնդիրն է, Դուք պատգամավոր եք ու պարտավոր եք պատասխանել չորրորդ իշխանության ներկայացուցչի հարցերին, ես Ձեզ անձնական հարցերով չեմ դիմում:

-Լավ եմ անում չեմ պատասխանում: 

-Դուք մոռանում եք, որ իմ հարկերով եք նաեւ աշխատավարձ ստանում:

-Լավ էլի, ախպոր պես:

-Ես Ձեր ախպերը չեմ, Դուք լավ կլինի իմ հարցերին պատասխանեք:

-Ես մի բան կասեմ, Ձեր աշխատավարձը հաստատ էնքան չի, որ ես Ձեր աշխատավարձի հաշվին աշխատավարձ ստանամ: Ձեր եկամտահարկը հաստատ էդքան չի լինի: Վերջ (-ու դռան շրխկոց. Ի.Ա.):

Զրույցը՝ ԻԼՈՆԱ ԱԶԱՐՅԱՆ

Iravunk.com