Լուրջ դիվերսիա Պալաչի՝ Արթուր Հարությունյանի դեմ

Աբովյանում հունիսի 7-ին կայանալիք քաղաքապետի արտահերթ ընտրություններին սահմանված ժամկետում՝ մինչև մայիսի 17-ի ժամը 18-ը, ինքաառաջադրվել է 6 անկուսակցական թեկնածու:
Այս մասին «Փաստինֆո»-ի թղթակցին հայտնեց Կենտրոնական ընտրական հանձնաժողովի նախագահի մամուլի քարտուղար Հերմինե Հարությունյանը:
Այսպես՝ թիվ 28 ընտրատարածքային ընտրական հանձնաժողով գրանցման փաստաթղթեր են ներկայացրել Ազգային ժողովի Տարածքային կառավարման և տեղական ինքնակառավարման հարցերի մշտական հանձնաժողովի փորձագետ Վահագն Գևորգյանը, «Չարենցավանի բեռնաուղևորատար ավտոտրանսպորտ» ԲԲԸ գլխավոր տնօրեն Արթուր Հարությունյանը, ով առավել հայտնի է «Պալաչ» մականունով, ոչ տեղ մի չաշխատող՝ Աբովյանի նախկին քաղաքապետ Կարապետ Իսրայելյանը, Սամվել Հակոբյանը, Էդվին Թադևոսյանը և Արթուր Հարությունյանը:

Ի դեպ, ըստ ԿԸՀ պաշտոնական կայքէջում հրապարակված տվյալների՝ առաջադրված երկու Արթուր Հարությունյանների հայրանունները ևս նույնն են՝ Գեղամի:
«Չարենցավանի բեռնաուղևորատար ավտոտրանսպորտ» ԲԲԸ գլխավոր տնօրեն Արթուր Հարությունյանը նախապես առաջադրվել էր որպես ՀՀԿ անդամ, սակայն նույն օրն, ավելի ուշ, պարզ էր դարձել, որ Արթուր Հարությունյանը հեռացվել է ՀՀԿ-ից, և ԿԸՀ-ի կայքէջում նա ներկայացվեց որպես անկուսակցական: ՀՀԿ-ից հեռացման մասին որոշումը կայացրել է Կոտայքի տարածքային կազմակերպությունը: Պատճառը կուսակցական կարգապահությունը խախտելն է, մասնավորապես՝ նա չի կատարել վերադաս ղեկավար մարմինների որոշումը: Բանն այն է, որ ՀՀԿ-ն որոշել է Աբովյանում սատարել Վահագն Գևորգյանին, սակայն Արթուր Հարությունյանը ևս առաջադրել է իր թեկնածությունը:
Չի բացառվում, որ «երկրորդ» Արթուր Հարությունյանին «առաջադրում են շփոթություն ստեղծելու համար:
Թեկնածուների գրանցման վերջնաժամկետը մայիսի 19-ի ժամը 18-ն է: