ԼՈՒՍԱՆԿԱՐՆԵՐ Լոռիում 23-ամյա երիտասարդը խեղդամահ է արել հոգեկան հիվանդ բարեկամուհուն ու բռնաբարել

1in.am-ը գրում է .
Լոռու մարզի ընդհանուր իրավասության դատարանում Սուրեն Բաղդասարյանի նախագահությամբ ավարտվել է Արսեն Մ.-ի գործի դատական քննությունը:

23-ամյա Արսենը մեղադրվում էր ծանրացուցիչ հանգամանքներում կատարած դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 12-րդ կետով:

Ըստ մեղադրանքի՝ Արսեն Մ.-ն սպանել է իր բարեկամուհուն, ինչը զուգորդվել է վերջինիս բռնաբարությամբ:

2016 թվականի մայիսի 10-ին, գիշերվա ժամը 2-ին Արսեն Մ.-ն սեռական հարաբերություն ունենալու նպատակով  ոգելից խմիչք օգտագործած վիճակում գնացել է իրենց գյուղում բնակվող բարեկամուհու՝ շիզոֆերնիայով տառապող Սուսաննա Գ.-ի տուն:

Ըստ մեղադրանքի՝ Արսենն առաջարկել ու փորձել է Սուսաննայի հետ սեռական հարաբերություն ունենալ: Նա շոյել է անկողնում պառկած աղջկա հետույքը: Սուսաննան կտրականապես մերժել է, սպառնացել է, թե կդիմի ոստիկանություն:

Արսեն Մ.-ն, առաջադրված մեղադրանքի համաձայն, նախ ապտակել է Սուսաննային, հետո կպչուն ժապավենով փակել է նրա բերանը, խալաթով կապել է ձեռքերը, սրբիչով փակել է շնչուղիները՝ խեղդամահ է արել ու նաև սեռական հարաբերություն է ունեցել Սուսաննայի հետ՝ զգալով, որ նա անշարժացել է:

Այնուհետև, իր արարքի հետքերը թաքցնելու նպատակով Արսեն Մ.-ն մասամբ այրել է Սուսաննայի դիակն ու անկողնային պարագաները:

Տուժող Սուսաննային բռնաբարությամբ զուգորդված սպանելու համար առաջադրված մեղադրանքում Արսեն Մ.-ն իրեն մեղավոր է ճանաչել ինչպես նախաքննության, այնպես էլ դատաքննության ժամանակ:

Դատարանում Արսենը հրաժարվել է ցուցմունքներ տալուց: Նա հայտնել է, թե ալկոհոլային հարբածության պատճառով չի հասկացել ու չի գիտակցել իր գործողությունները: Եթե հասկանար, այդպիսի բան չէր անի:

Նախաքննական ցուցմունքում Արսենը հայտնել է, թե շուրջ մեկ տարի առաջ բաժանվել էր իր փաստական կնոջից՝ միմյանց չեն հասկացել: Իսկ Սուսաննան իր հոր հորաքրոջ աղջիկն էր: Նա հոգեկան հիվանդություն ուներ, բժշկի կողմից նշանակված դեղեր էր խմում:

Սուսաննան մենակ էր ապրում, ինքը գնում-գալիս էր նրա տուն, հետևում էր, որ դեղերը խմի, իր փաստական կնոջ հետ էլ որոշ ժամանակ ապրել է Սուսաննայի տանը:

2016 թվականի մայիսի 9-ին ինքը հարևանի տանը փայտ է ջարդել ու ոգելից խմիչք է օգտագործել: Գիշերը տանը հեռուստացույց է դիտել, ժամը 1-2-ի սահմաններում իր մոտ սեռական հարաբերություն ունենալու ցանկություն է առաջացել:

Վեր է կացել ու գնացել է Սուսաննայի տուն: Հրել-բացել է տան դուռը:

Սուսաննան անկողնում պառկած էր: Ինքը նստել է նրա մահճակալին, հարցրել է, թե ոնց է: Նա ասել է, թե լավ է, բայց չի հասկանում, թե այդ ուշ ժամին ինքն ինչու է եկել: Ինքն ասել է, թե անհանգստանալու կարիք չկա: Ծխել է, նորից նստել է Սուսաննայի մահճակալին, ձեռքը տարել է վերմակի տակ ու շոյել է նրա հետույքը:

Սուսաննան մի կողմ է քաշվել ու իրեն սեռական հայհոյանք է տվել: Ինքը դրանից զայրացել ու նրան մեկ անգամ ապտակել է: Սուսաննան սկսել է գոռգոռալ:

Ինքը գիտեր՝ նրա տանը ինչը որտեղ է դրված: Պահարանի դարակից «սկոչ» է հանել, մոտեցել է Սուսաննային, ձախ ձեռքով սեղմել է նրա ձեռքերը ու բացած «սկոչով» փակել է նրա բերանը, որպեսզի չգոռա:

Այնուհետև մահճակալի գլխավերևում գտնվող կապույտ ծաղկավոր խալաթով կապել է նրա ձեռքերը, ոտքերի մոտ ընկած սրբիչը դրել է նրա բերանին և ուժեղ սեղմել է:

Տեսել է, որ Սուսաննան չի շարժվում, սրբիչը հետ է քաշել ու նրա հետ սեռական հարաբերություն է ունեցել:

Ավարտելով՝ պոկել է բերանը փակող կպչուն ժապավենը, քանդել է խալաթով կապված ձեռքերի կապը, սրբիչը նախկին տեղն է դրել, դիակը շրջել է ու իր մոտ եղած լուցկիով այրել է անկողինը: Վառել է նաև հարևան սենյակի անկողինը, որպեսզի ամբողջ տունը ու դիակն էլ հետը այրվեն:

Դուրս գալիս մաքրել է մուտքի դուռը՝ իր թողած մատնահետքերը մաքրելու նպատակով:

Գնացել է տուն: Որոշ ժամանակ մնալուց հետո անհանգստացել է, որոշել է վերադառնալ ու տեսնել, թե ինչ եղավ:

Սուսաննայի տանը մոտենալով՝ տեսել է՝ լույսը վառվում է, երևում է, որ տունը ծխով է լցված:

Որպեսզի իրեն չկասկածեն, զանգել է իր եղբորը, հետո օգնության է կանչել ընկերոջը: Նրանց ասել է, թե Սուսաննայի տան մոտով պատահական անցնում էր, տեսել է, որ ներսում ծուխ կա: Եղբոր ու ընկերոջ օգնությամբ սկսել է մարել հրդեհը: Եղբայրն ու ընկերը տեսել են Սուսաննայի դիակը՝ անկողնում կիսաայրված վիճակում: Զանգել են հրշեջ ծառայություն:

Երբ ոստիկանները դեպքի վայր են եկել, ինքը խոստովանել է, որ ինքն է սպանել Սուսաննային ու հրկիզել է նրա տունը:

Արսենը զղջացել է կատարածի համար, պնդել է, որ եթե խմած չլիներ, նման բան չէր անի:

Տուժողի դիակի դատաբժշկական փորձաքննության եզրակացությամբ՝ մահը վրա է հասել խեղդամահության արդյունքում՝ շնչուղիները փակելու եղանակով:

Ըստ եզրակացության՝ տուժողի հետ սեռական հարաբերություն կարող էր լինել ինչպես մինչև մեխանիկական շնչահեղձությունը, այնպես էլ մեխանիկական շնչահեղձությունից հետո՝ դիակի հետ… Տուժողի սեռական օրգաններում հայտնաբերվել են սերմնաէակներ…

Արսեն Մ.-ն ճանաչվել է մեղսունակ:

Արսեն Մ.-ն մեղավոր է ճանաչվել մեղսագրված արարքի համար՝ ՀՀ քրեական օրենսգրքի 104 հոդվածի 2-րդ մասի 12-րդ կետով, և դատապարտվել է 14 տարի ազատազրկման:

Պատժի սկիզբը՝ 2016 թվականի մայիսի 10-ից:

Լուսանկարները՝ Shamshyan.com-ի