«Մալաթիա» բժշկական կենտրոնը դեռ լուրջ անելիքներ ունի

Անկախ տարիքից և զբաղեցրած դիրքից յուրաքանչյուր մարդ պայքարում է թեկուզ մեկ օրով երկարացնել իր կյանքը, և որ ամենակարևորն է` այդ օրերն ապրել առողջ: Դժվար թե գտնվի մեկը, ով գոնե մեկ անգամ այցելած չլինի բժշկի, և չապավինի նրա մասնագիտական կարողությանը: Բժշկությունը այն եզակի ոլորտներից է, որն ժամանակի հետ պահանջում է կատարելագործում և նորարարություն,և հենց այդ կարևորությունները հաշվի առնելով Fnews.am-ը կփորձի պարբերաբար ներկայացնել Հայաստանի Բժշկական Կենտրոններում տիրող վիճակը:

Այցելելով <Մալաթիա> Բժշկական Կենտրոն առաջնային աչք շոյեց հիվանդանոցում տիրող մաքրությունը, իսկ դրանից հետո արդեն  անձնակազմի բարեհամբյուր մոտեցումը: Խոսելով կենտրոնի ղեկավար Ասատուր Ասատրյանի հետ, տեղեկացանք, որ կենտրոնը նորովի իր այցելուներին ներկայացել է 2011թ.-ին, մինչ այդ հիվանդանոցն ունեցել է ընդհանուր վիրաբուժության, վնասվածքաբանության, նյարդաբանական բաժանմունքներ և ծննդատուն: Հետագայում այդ բաժանմունքները վերանորոգվել են, վերազինվել նորագույն տեխնոլոգիաներով, ժամանակակից բոլոր պահանջները բավարարող վիրահատական սրահներով, և որ ամենակարևորն է պրոֆեսիոնալ բուժանձնակազմով:Մեր զրուցակիցը նշեց նաև, որ դեռ կենտրոնի վերականգնողական աշխատանքները շարունակվում են, և գերմանական նախագծային, ճարտարապետական ընկերություններից մեկի հետ համագործակցության արդյունքում, մշակվել է ապագա կենտրոնի այնպիսի նախագիծ, որտեղ հայտնի գերմանական ճշգրտությամբ հաշվարկված է ամեն ինչ` սկսած բժշկական սարքերի տեղաբաշխումից մինչև մասնաշենքերի միջև բժիշկների, բուժանձնակազմի, հիվանդների, հիվանադատերերի հոսքերի ճիշտ բաշխումը: Այն հարցին թե արդյո՞ք կենտրոնի ծառայությունները հասու են բոլորին, պարոն Ասատրյանը վստահեցրեց, որ իրենց ծառայություններից կարող են օգտվել բոլորը, և նկատեց նաև,որ Հեմոդիալիզի ծառայությունը <Մալաթիա> ԲԿ-ում կատարվում  է առանձնակի մոտեցմամբ ու ուշադրությամբ, իսկ այս պահին այդ բաժանմունքում   իրենք ունեն մոտ 150 հիվանդ: Բայց չդավաճանելով որդեգրած սկզբունքին` այն է` <ամեն ինչ հոգուտ հիվանդի> կենտրոնը կազմակերպում է նաև <բաց դռների օր> ՀՀ մարզերում և Երևանում, տալիս անվճար խորհրդատվություն, կատարում ախտորոշումներ, հարկ եղած դեպքում նաև վիրահատություններ:

Զրույցի վերջում պարոն Ասատրյանը հավելեց, որ իրենք կարևորում են միջազգային համագործակցությունը և լուրջ քայլեր են արվում համաշխարհային բժշկական լավագույն փորձը Հայաստան բերելու ուղղությամբ: Առաջիկայում ծրագրվում է այդ համագործակցություններին հիմնական բնույթ տալ, այսինքն` արտասահմանցի բարձրակարգ մասնագետներին հրավիրել <Մալաթիա> ԲԿ` մեր բժիշկների հետ երկարաժամկետ աշխատանքի: Այս երկարատև աշխատանքային այցերն ավելի խոշոր արդյունք կտան ու էապես կազդեն մեր բժշկության որակի բարձրացման վրա:

Վարդուհի  Սաֆարյան