Մանկատան սան` Մարատի ընտանիքը, դիմում է Սամվել Կարապետյանին եւ Գագիկ Ծառուկյանին

Newsmedia.am-ին է դիմել Սումգաիթյան ջարդերից մի կերպ մազապուրծ եղած` Գավառի մանկատանը բնակություն հաստատած 38-ամյա Մարատ Շամիրյանը: Մարատը` Սումգաիթյան ջարդերի հետեւանքով կորցրել է ծնողներին,  եւ մնացել որբ: Գավառի մանկատնից դուրս գալով, որպես երկկողմանի ծնողազուրկ, որպես մանկատան սան  բնակարան է ստացել  Էջմիածնում` անհատույց օգտագործելու պայմանով: Բայց այժմ հայտնվել  է  անելանելի վիճակում, որովհետեւ այրվել է իր բնակարանը,լ ու նա հայտնվել է  դրսում:
Մարատը հայտնվելով անելանելի վիճակում` ստիպված դիմում է բարերարներին, հույս ունենալով, որ  նրան կօգնեն գտնելու  հիմնական աշխատանք(այժմ մասնավոր տեղերում բանվորություն է անում` ինչ պատահի), որպեսզի կարողանա վերանորգել իր այրված բնակարանը,  եւ դուրս գալ` վարձով բնակվող մեկ սենյականոց խոնավ, ցուրտ բնակարանից:
Անդրադառնալով իր պատմությանը,  Մարատն իհարկե  ամաչելով, բայց այլ ելք չունենալով ասում էր. 
- Ձեռք էլ ունեմ, ոտք էլ. կաշխատեմ` ինչ պատահի: Մենակ թե գործ ունենամ, որպեսզի համ ընտանիքս պահեմ, համ էլ պետության տրամադրած տունս վերանորգեմ:Երբ ինձ  Էջմիածնում բնակարան տվեցին, ես շատ պարտավորվեցի: Տարիների ընթացքում,  ես կարողացա իմ աշխատանքով վերանորոգել բնակարանս, կահույք գնել, ընտանիք կազմել, ու նաեւ մեկ աղջիկ ունենալ:

Բայց 2008 թվականի օգոստոսի 3-ին,  կարելի ասել իմ մեղքով այրվեց բնակարանս` ուշադիր չենք եղել հոսանքի հետ կապված: Ընտանիքիս հետ հայտնվեցի դրսում: Առանց որեւէ իրի, մենակ հագուստները կարողացանք վերցնել, ու  հասնել Երեւան` Կոնդ: Վարձակալեցի մեկ սենյականոց անմխիթար վիճակում գտնվող, խոնավ ու  ցուրտ բնակարան, դե փողոցում հայտնված մարդու համար` կարեւորը ծածկ ունենալն էր: Բայց ստիպված՝ արդեն մեկ տարի, անչափահաս աղջկաս հետ միասին  գոյատեւում ենք  այդ խոնավ, մեկ սենյականոց խցում:
Բազմաթիվ անգամներ դիմել եմ երկրի ղեկավարությանը. ե՛ւ ՀՀ վարչապետին ե՛ւ ՀՀ վարչապետի տիկին Աննա Հակոբյանի "Իմ քայլը" հիմնադրամին, բայց մերժում եմ ստացել: "Իմ քայլը" հիմնադրամից պատասխանել են, որ հիմնադրամը ժամանակավորապես կասեցրել է նման ծրագրերը, քանի որ  հինգ-վեց ամսվա մեջ երեք բնակարան են վերանորոգել: Պատասխանել են, որ այս պահին նվիրատվություն անողներ չկան:
Ես այլ ելք չունեմ, ստիպված դիմում եմ Ձեր լրատվամիջոցին, որպեսզի գոնե
այս կերպ ուշադրություն հրավիրեմ իմ խնդրին: Դիմում եմ բարերար Գագիկ Ծառուկյանին եւ Սամվել Կարապետյանին: Ես շատ եմ լսել, որ իրենք անտարբեր չեն լինում անապահով մարդկանց խնդիրներին: