Մանվել Եղիազարյանը առայժմ շատ փակագծեր չի բացում

Թե ինչո՞ւ «Արաբո» ջոկատի հրամանատար Մանվել Եղիազարյանը որոշեց համալրել Վարդան Օսկանյանի «Համախմբում» կուսակցության շարքերը, նա այդ մասին շատ բան չի ասում: Իր որոշմանն առաջիկայում Մանվել Եղիազարյանը պատրաստվում է մանրամասնորեն անդրադառնալ առանձին թեմայով, բայց առայժմ զերծ է մնում մեկնաբանություններից:Fnews.am-ի հետ զրույցում նա հիմնական պատճառներից մեկը նշեց. «Ուզում եմ նորմալ երկրում ապրենք, ուզում եմ ապրենք` ոչ թե գոյատևենք. սա կյա՞նք է, որ մենք ապրում ենք… »:

Թե ինչպե՞ս է պատրաստվում կուսակցությունը տանել ժողովրդին դեպի այդ բարեկեցիք կյանքը, Մանվել Եղիազարյանը նկատեց, որ ժամանակը ցույց կտա, իսկ հիմա վաղ է դրա մասին խոսել, քանի որ կուսակցության ներսում դեռ աշխատանքներ կան անելու: Նրա խոսքով, երբ կազմավորման աշխատանքները վերջնական փուլին կհասնեն ու կբացվեն նաև մարզային կառույցներ` այդ ժամանակ արդեն կարելի է խոսել նաև անելիքների մասին: Իսկ այսօր Մանվել Եղիազարյանն ամպագոռգոռ հայտարարություների անհրաժեշտություն դեռ չի տեսնում: «Ես այն մարդկանցից չեմ, ով սկսում է հայտարարել, թե էս կանենք, էն կանենք. Այ, կազմավորման աշխատանքները երբ կավարտվեն, այն ժամանակ կխոսեմ… երբ անելիքների մասին շատ են խոսում, մարդիկ ասում են, թե տեսե’ք, էլի սկսեցին մեծ-մեծ խոսել ու խոստումներ տալ… Կա պայքար, կա կուսակցություն, կա վարչություն, որը որոշումներ կկայացնի ու կշարժվենք առաջ… այ, էն ժամանակ էլ կխոսեմ»,-ասաց Մանվել Եղիազարյանը: Հարցին, թե ինչո՞ւ նույն այդ սկզբունքով «Բարգավաճ Հայաստան» կուսակցության նախկին անդամ, այժմ «Համախմբում» կուսակցության ղեկավար Վարդան Օսկանյանը «չբարգավաճեցրեց» ԲՀԿ-ն և առաջ չտարավ, Մանվել Եղիազարյանը նկատեց, որ ԲՀԿ-ն ունի իր ղեկավարը, ունի իր շարժումն ու գաղափարախոսությունը:

«Երևի Վարդան Օսկանյանն այնտեղ մեծ ազդեցություն չէր կարող ունենալ»,-ասաց նա: Հիշեցնենք, որ հունիսիս 16-ին «Համախմբում» կուսակցությունը գումարեց հիմնադիր համագումար, որի ընթացքում ձայների մեծամասնությամբ կուսակցության նախագահ ընտրվեց ՀՀ նախկին արտգործնախարար, պատգամավոր Վարդան Օսկանյանը, փոխնախագահներ` ԱԺ Տարածքային կառավարման և տեղական ինքնակառավարման հարցերի մշտական հանձնաժողովի նախագահ Ստեփան Մարգարյանը և ԱԺ Մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանը: Կուսակցության վարչության կազմում ընդգրկված են 16 անձինք: Նրանց թվում են` նաև «Արաբո» ջոկատի հրամանատար Մանվել Եղիազարյանը և ՀՀ մարդու իրավունքների նախկին պաշտպան Կարեն Անդրեասյանը:

Նարինե Մանուկյան