Մարդիկ գալիս են ոչ թե միանալու, այլ կողքից նայելու համար

Հայերը թամաշա անող են...

Սոցիոլոգ Ահարոն Ադիբեկյանը վստահ է` սոցիալական ինչ իրավիճակում էլ հայտնվենք, Հայաստանում ժողովուրդը չի ըմբոստանա, հեղափոխություն չի անի: Fnews.am-ի հետ զրույցում նա իր թվերն է ներկայացնում: Կատարված հարցումների արդյունքում պարզել է, որ մեր պոտենցյալ ներուժը բավականին ցածր է:

«Հնարավոր է հայերի մեջ կան խմբավորումներ, որոնք ծայրահեղական են, տաքարյուն են… և փորձում են գործի դնել վերջին հնարավորություններն իրենց նպատակի իրականացման համար, բայց որ ժողովուրդը ոտքի ելնի` բացառվում է»,-նկատում է սոցիոլոգը:

Նա ուշադրությունը սևեռում է «Սասնա ծռեր» ջոկատի նախաձեռնությանը, նկատելով, որ մարդիկ գալիս են ոչ թե միանալու այդ նախաձեռնությանը, այլ կողքից նայելու համար:
«Ոչ-ոք չի գալիս ու գոռալով ձեռքը բարձրացնում` պահանջելով Սեֆիլյանի ազատությունը…Հայերը թամաշա անող են, եթե մեկը դժգոհ է, թո’ղ դժգոհի, ես կողքից կնայեմ»,-նշում է Ահարոն Ադիբեկյանը:

«Սա ոչ թե հեղափոխություն, այլ խռովություն է… իշխանափոխությունը այն է, ինչ տեսնում ենք Թուրքիայում, ինչ տեսանք Ուկրաինայում. Մի քանի տասնյակ հազար մարդ հավաքեցին Մայդանում և իշխանափոխություն արեցին»,- պարզաբանում է սոցիոլոգը:
Նրա դիտարկմամբ` Հայաստանում հեղափոխության համար նախ հարկավոր են օբյեկտիվ պայմաններ և ուժ, որը կարող է աստիճանաբար կազմակերպել ու թունավորել ժողովրդին համապատասխան գաղափարներով: 

Հիշեցնենք, որ լույս 17-ի ժամը 05:30-ին «Հիմնադիր խորհրդարան»-ի և «Սասնա ծռեր» ջոկատի մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց։ Զինված ահաբեկչական խմբավորման հետ բախման հետևանքով զոհվել է ՀՀ ոստիկանության պարեկապահակային ծառայության գնդի փոխհրամանատար, գնդապետ Արթուր Վանոյանը։ Մի քանիսը` այդ թվում նաև հարձակում իրականացրած անձանցից, ստացել են մարմնական վնասվածքներ: Կան պատանդներ: