Մարդիկ սիրտ չունեն Նոր տարի նշելու, բայց փոքրիկներին էլ զրկել տոնից չի կարելի. Կարինե Նալչաջյան

Մարդիկ խորապես հասկանում են այն ողբերգությունը, որում մեջ հայտնվել է մեր երկիրը՝ անկախ նրանից իր ընտանիքում կորուստներ կան թե չկա, անկախ նրանից, թե ինքը Սյունիքո՞ւմ, Արցախո՞ւմ, թե՞ Երևանի կենտրոնում է ապրում: Այս մասին Tert.am-ի հետ զրույցում ասաց հոգեբան Կարինե Նալչաջյանը՝ անդրադառնալով Նոր տարին նշելու թեմային:

«Գիտակից մարդիկ հասկանում են, որ մենք շատ ողբերգական վիճակում ենք հայտնվել և շարունակում ենք խրվել այդ ճահճի մեջ: Այդպիսի մարդիկ չեն կարող նոր տարվա հետ կապված տոնական տրամադրության մեջ լինել: Մարդիկ սիրտ չունեն և դա նորմալ է, բայց բոլոր դեպքերում Նոր տարին խորհրդանշական տոն է, բոլորը նշում են, որ այս 2020 թվականը շատ վատի տարի էր և սիմվոլիզմի մակարդակով ներքին զգացողություններ ունեն մարդիկ, որ տարին փոխվի՝ մի նոր լավ բան կլինի, հույսի կայծը, երազանքը լավ բան է, բայց դա պետք է հող ունենա իր տակ»,-ասաց նա:

Հոգեբանը նշեց, որ եթե ամեն դեպքում մարդիկ կան, որ շատ են սիրում տոները հրճվանքի մեջ անցկացնել, այստեղ արդեն բարոյական հարց ծագում: «Չէ՞ որ այդպիսի ողբերգություններ են տեղի ունեցել, հայրենակիցները տուն ու տնից են զրկվել: Այսինքն՝ բարոյական արգելքների խնդիրներ կան»,-ասաց նա:

Կարինե Նալչաջյանն ասաց, որ ամեն դեպքում Նոր տարին նաև երեխաների տոնն է՝ Ձմեռ պապով, տոնածառով, նվերներով: «Ես այն կարծիքին եմ, որ փոքրիկներին էլ զրկել տոնից չի կարելի, այնպես որ այն ընտանիքներում, որտեղ կան երեխաներ կարող են զուսպ ձևով նշել՝ երեխան տոնածառ զարդարի, ձմեռ պապիկը թող նվեր բերի, բայց բարձրագոչ, նվագ, երգ, պար խնդություն դա էլ պետք չէ: Տասնյակ հազարավոր մարդկանց տներում սուգ է, պետք է զուսպ լինել նաև երեխաների հարցում՝ բայց չզրկել տոնից»,-ասաց նա: