Մարզպետի ու քաղաքապետի միջեւ «սեւ կատու» չի՞ անցել...

Տեւական ժամանակ է ինչ հանրության շրջանում, մասնավորապես Լոռու մարզում խոսակցություններ են շրջանառվում այն մասին, որ Վանաձորի քաղաքապետ Սամվել Դարբինյանի եւ Լոռու մարզի մարզպետ Արթուր Նալբանդյանի "ջրերը" մեղմ ասած մի առվով չեն հոսում: Իսկ նրանց լարված հարաբերությունների արմատները բավական խորն են. չհաշված, որ բոլորովին համառ լուրեր էին պտտվում այն մասին, թե Վանաձորի քաղաքապետի մտքով անցել է Լոռու մարզպետ դառնալ, ինչն էլ սակայն իրականություն չի դարձել: Իհարկե Դարբինյանը հերքել է այդ տեղեկությւոնները, ասելով որ նման բան չկա, բայց մինչ օրս Լոռու մարզում այդ մասին հետաքրքիր ասեկոսեներ են պտտվում...

Այս օրերին  էլ, ըստ տարածված լուրերի, ասում են կրկին շիկացել են մարզպետ-քաղաքապետ լարված հարաբերությունները`  քաղաքի աղբահանման 4 մեքենաները` վաճառքի հանելու հետ  կապված:  Ավելին, խոսք էր գնում նաեւ այն մասին, որ  այս թեմայի շուրջ մարզպետի ու քաղաքապետի միջեւ  շատ թեժ զրույց է տեղի ունեցել, որն այնքան էլ լավ ավարտ չի ունեցել: 

Վերոնշյալի հետ կապված, Fnews.am-ը  փորձեցի մեկնաբանություն ստանալ նախ Լոռու մարզի մարզպետ Արթուր Նալբանյանից, ով մասնավորապես ասաց.
-Վանաձորի քաղաքապետի հետ իբր մեր լարված հարաբերությունները իրականությանը չեն համապատասխանում, որովհետեւ Վանաձորի քաղաքապետի հետ մենք շատ ջերմ հարաբերություններ ունենք, այդ թվում նորմալ աշխատանքային: Մենք հաճախ ենք հանդիպում քաղաքապետի հետ եւ քննարկումներ անցկացնում Վանաձոր քաղաքին վերաբերող բազմաթիվ հարցերի շուրջ: Եվ բնականաբար, ոչ մի քննարկում չի կարող բերել իմ Դարբինյանի միջեւ հարաբերությունների վատացման:
Մենք փորձեցինք կապ հաստատել  նաեւ ժամանակ առ ժամանակ սկանդալների կիզակետում հայտնվող Վանաձորի քաղաքապետ Սամվել Դարբինյանի հետ, սակայն,  այդպես էլ  նրա մեկնաբանությունը  մեզ լսել չհաջողվեց:

Տաթեւիկ  Աբրահամյան