Մեկ ամբաստանյալի մեղավորության հարցում կասկածներ ունեմ. մահացած նորակոչիկի հայր

Դատարանն այսօր մասնակի բավարարեց պաշտպանության բանակ զորակոչված և զինհոսպիտալում մահացած նորակոչիկ Նորայր Սահակյանի գործով պաշտպանական կողմի միջնորդությունը և որոշում ընդունեց լրացուցիչ հանձնաժողովային դատաբժշկական փորձաքննություն նշանակելու մասին: Պաշտպանական կողմը միջնորդում էր նշանակել կրկնակի հանձնաժողովային փորձաքննություն:

Մասնավորապես, պաշտպանական կողմը գտնում է, որ Գագիկ Հարությունյանի գլխավորությամբ դատաբժշկական հանձնաժողովային փորձաքննությունը կատարվել է թերի: Եզրակացությամբ պատասխան չի տրվել քննիչի կողմից տրված մի շարք հարցերի:

Միջնորդությունը ներկայացրեցին ամբաստանյալներ Կարեն Ջուլհակյանի պաշտպան Նորայր Նորիկյանը, Մհեր Դավիդյանցի պաշտպան Երեմ Սարգսյանը և Արկադի Չախոյանի պաշտպան Գեղամ Հակոբյանը:

Պաշտպանները միջնորդեցին նշանակել կրկնակի դատաբժշկական հանձնաժողովային փորձաքննություն, փորձագետներին առաջադրելով մի շարք հարցեր:
Մասնավորապես՝ ի՞նչ մեթոդներ են կիրառվել հանձնաժողովային դատաբժշկական փորձաքննության սկզբնական կատարման ընթացքում, և արդյո՞ք կիրառված այդ մեթոդները գիտականորեն հիմնավորվա՞ծ են, թե՞ ոչ:

Նորայր Սահակյանի մոտ ախտորոշված սրտամկանի հիպերտրոֆիա հիվանդությունները ի՞նչ վաղեմություն ունեն: Կենդանության օրոք առկա հիվանդությունների պարագայում պատվաստումը հակացուցված չի՞ եղել, արդյոք, ի՞նչը կարող էր հիվանդությունների սրացման պատճառ դառնալ: Նման առողջական վիճակի պայմաններում նա ենթակա՞ էր պատվաստման, թե՞ ոչ:

«Ֆիբրոբլաստիկ էնդոկարդիտի, հետադարձ գորտնուկավոր էնդոկարդիտի, սրտամկանի հիպերտրոֆիա» հիվանդությունները Սահակյանի մահվան հետ պատճառական կապի մեջ գտնվե՞լ են, թե՞ ոչ և ինչո՞ւ:

Փորձաքննությամբ ի՞նչ մեթոդների հիման վրա են գնահատել, որ Կարեն Ջուլհակյանը ճիշտ չի գնահատել Նորայր Սահակյանի վիճակը: Ջուլհակյանի կողմի ախտանշային բուժում պե՞տք է կատարվեր, թե՞ ոչ, և ի՞նչ բուժում պետք է կատարվեր, որը չի կատարվել: Առկա՞ է, արդյոք, Կարեն Ջուլհակյանի գործողություններում և Նորայր Սահակյանի մահվան մեջ անմիջական պատճառական կապ:

Իվանյանի անվան զինհոսպիտալում Սահակյանին ճիշտ բուժօգնություն ցուցաբերվե՞լ է, թե՞ ոչ, եթե ոչ, ապա բուժօգնության կազմակերպման ընթացքում ի՞նչ թերություններ և բացթողումներ են եղել, կոնկրետ ո՞ւմ կողմից, դրանք գտնվում են Սահակյանի մահվան անմիջական պատճառական կապի մեջ, թե՞ ոչ:

Հոսպիտալ ընդունվելիս Սահակյանի մոտ նախնական ախտորոշված հիվանդությունը՝ հետպատվաստումային ռեակցիա, Մհեր Դավիդյանցի կողմից նշանակված բուժումը և հետազոտությունները արդյո՞ք ճիշտ և բավարար են եղել, թե՞ ոչ:

Մահվան հանգեցրած հիվանդությունը ե՞րբ է զարգացել Սահակյանի մոտ և պատվաստանյութերն ի՞նչ ազդեցություն են ունեցել դրա վրա:

մանրամասները՝pastinfo.am-ում: