Մելիք գյուղը որոշել է ճանապարհը փակել. «Հրապարակ»

«Հրապարակ» թերթը գրում է. «Վերջին մեկ-երկու տարում հանրությունը բողոք արտահայտելու լավագույն միջոց է ընտրել հանրապետության տարբեր բնակավայրերում մայրուղիները փակելով: Դա կազմակերպվում է հատկապես այն ժամանակ, երբ բնակիչները նախօրոք տեղեկանում են, որ մայրուղով խոշոր պաշտոնյա է անցնելու: Այսօր Արագածոտնի մարզի Մելիքգյուղ համայնքի բնակիչները պատրաստվում են փակել Երևան-Վանաձոր մայրուղին: Պատճառը «Մեգո Գոլդ» ոսկի արդյունահանող ընկերության անօրինական գործունեությունն է գյուղին պատկանող 253 հեկտար հողատարածության վրա: Ընկերությունն այս տարածք է ներխուժել դեռևս 2006 թվականին և, ըստ բնապահպանության նախարարության լիցենզիայի, իրավունք է ունեցել 2 տարի ուսումնասիրություններ անցկացնել Մելիքգյուղի Թուխմանուկ կոչվող տարածքում: Սակայն 2006 թվականից մինչև անցած տարի մարդիկ անօրինական հիմունքներով, բաց եղանակով ոսկի են կորզել Մելիքգյուղում և այսօր էլ շարունակում են, կարծես նշված 253 հեկտար հողատարածքը ոչ թե պատկանել է Մելիքգյուղին, այլ ընկերության տնօրեն Աշոտ Պողոսյանին, ով սեպտեմբերի 10-ին գյուղում կազմակերպված հասարակական լսումների ժամանակ դահլիճում ասաց, որ Մելիքգյուղը 1000 հեկտարից ավելի արոտավայր ունի, 250-ն էլ թող արտադրական նշանակության համար օգտագործվի:

Հատկանշական է, որ հասարակական լսումների ժամանակ գյուղացիները վերջնականապես դեմ չարտահայտվեցին հանքավայրի շահագործմանը, սակայն ընկերությանը ներկայացրին 5 կետից բաղկացած մի փաստաթուղթ՝ գյուղի խնդիրների վերաբերյալ, և խոստացան դրանց լուծման դեպքում չխոչընդոտել հանքի շահագործմանը: Սակայն, ինչպես նշում է Մելիքգյուղ համայնքի ղեկավար Հակոբ Մկրտչյանը, ոսկի արդյունահանողներն այդ օրվանից գյուղ չեն մտել: Այն դեպքում, երբ վերջիններս այլ չկատարած պարտավորություններ էլ ունեն Մելիքգյուղում. չեն վճարել իրենց մոտ աշխատող մելիքգյուղցիների աշխատավարձը, միևնույն ժամանակ պարտավորություններ ունեն նաև գյուղապետարանի նկատմամբ:

Մանրամասները՝ թերթի այսօրվա համարում