Մենք բոլորս գիտենք, որ Վարդան Ղուկասյանի մոտ շատ մեծ արխիվ կա. թող բոլորը ներկայացնի

«Ձեր լրատվական կայքում տեղադրված, ապա շատ արագ լայն տարածում ստացած տեսանյութը մեզ ապացուցեց հերթական անգամ, որ նախորդ իշխանության օրոք ոստիկանությունում մարդկանց խոշտանգում էին»,-NewsMedia-ի հետ զրույցում անդրադառնալով «Հայրենի ոստիկանները՝ մահակով ու հակագազով ցուցմունք են կորզում» աղմկահարույց տեսաձայնագրությանը, ասաց «Իրազեկ քաղաքացիների միավորում» ՀԿ-ի նախագահ Դանիել Իոնիսյանը, նկատելով.

-Ինչ վերաբերում է կոնկրետ դեպքին, ապա ես եւ շատ-շատերս վստահ ենք, որ ՀՔԾ-ն որեւիցէ մոտիվացիա չունի այս դեպքը պարտակելու, եւ չբացահայտելու համար:

Բայց կարող են լինել շատ ու շատ խնդիրներ, որոնք հնարավորություն չտան բացահայտելու առերեւույթ խոշտանգողի կամ խոշտանգողների ինքնությունը:
Ի վերջո տեսանյութում դեմքերը լավ չեն երեւում, եւ հնարավոր է, որ մարդկանցից ոմանք չկան, կամ արտագաղթել են: Բայց, այն որ ՀՔԾ-ն շահագրգռված է կոնկրետ դեպքի բացահայտմանը՝ կասկած չկա:

-Իսկ ինչով ե՞ք վստահ, որ բնօրինակում շատ ավելի շատ հանգամանքեր ի հայտ չեն գան, որոնք կփարատեն Ձեր հնչեցրած հանգամանքների անորոշությունը:

-Ես չգիտեմ բնօրինակը ՀՔԾ-ն ունի , թե ոչ: Ավելին, Ես Վարդան Ղուկասյանին կոչ կանեմ ներկայացնել մնացած բոլոր տեսանյութերը , որոնք իր մոտ կան: Մենք բոլորս գիտենք, որ իր մոտ շատ մեծ արխիվ կա, թող բոլորը ներկայացնի: Թող ներկայացնի եւ հանրությունը իմանա, կներեք համոզվի նախկին ոստիկանների խոշտանգումների, եւ այլ մութ էջերի մասին:
-Բայց ՌՈ նախկին աշխատակից Վարդան Ղուկասյանը՝նույն ինքը Դոգը, արդեն իսկ խոստացել է, որ հաջորդիվ լինելու են այլ հրապարակումներ եւ բացահայտումներ եւս:

-Վարդան Ղուկասյանը օպեր լիազոր է եղել, թող իր արխիվը միանգամից փոխանցի ՀՔԾ, որպեսզի ՀՔԾ-ն այդ գործերը քննի: Որովհետեւ եկեք հաշվի առնենք, որ պարզ է չէ՝ կոնկրետ դեպքում՝ տեսանյութում առկա մարդիկ իմանալով, որ այն ջրի երես է դուրս եկել, որ իրենցով պիտի զբաղվեն՝ կփախնեն երկրից, կամ ապացույցների ոչնչացման ուղղությամբ քայլեր կձեռնարկեն: Թող ներկայացնի նախ ՀՔԾ, որ այդ մարդիկ չիմանան, հետո նոր հրապարակի, որպեսզի քննության վրա այդ հրապարակումը որեւէ կերպ չազդի: Թե չէ տարիներ են անցնում, ամեն օր այդ գործերը ավելի դժվարանում են ապացուցման առումով:

-Պարոն Իոնիսյան, ի վերջո կոնկրետ այս գործի հետ կապված.դուք ի՞նչ դժվարություններ եք տեսնում՝ այն որպես իրեղեն ապացույց՝ բազմակողմանի քննության առարկա դարձնելու հետ կապված: Հատկապես որ հայտնի դարձավ, որ սկանդալային ադ տեսանյութի գործով ոստիկանության Ճամբարակի բաժնի պետի լիազորությունները ժամանակավորապես դադարեցվել են:

-Դե տեսնում եք, փաստորեն գործ արվում է, եւ այստեղ կարեւորն այն է, որ տեսանյութում հիմքեր կան:

-Պարոն Իոնիսյան, իսկ Դուք Ձեր գործունեության ընթացքում ոստիկանական բաժանմունքներում քանի՞ խոշտանգման դեպքերի մասին եք լսել:

- Բազմաթիվ, հազարավոր:

-Քանիսն ե՞ն նրանցից պատժվել:

-Միանգամից ասեմ՝ զրոն: Ոստիկանական բաժանմունքներում խոշտանգման դեպքերով պատժվածների թիվը զրո է: Խոշտանգման հոդվածով ՀՀ-ում դատապարտված մարդ երբեւիցէ չի եղել:

-Դուք Ձեր մասով, ի՞նչ քայլեր եք պատրաստվում ձեռնարկել՝ այս տեսանյութի բովանդակությանը ծանոթանալուց հետո:

-Ես ազնվությամբ ասեմ. ամեն մեկը պետք է իր պրոֆեսիոնալ ուղղությամբ աշխատի: «ԻՐԱԶԵԿ ՔԱՂԱՔԱՑԻՆԵՐԻ ՄԻԱՎՈՐՈՒՄ» ՀԿ-ն թեեւ ունի իրավապաշտպան էություն, բայց ինքը անմիջական իրավունքների պաշտպանությամբ զբաղվող ՀԿ չէ: Մենք ավելի շատ զբաղված ենք ՝ընդհանուր ժողովրդավարական արժեքների առաջխաղացմամբ: Մենք պրոֆեսիոնալ չենք՝ խոշտանգողների դեմ պայքարի մասով: Բայց ինչ խոսք. Ես վստահ եմ, որ մենք մեր հերթին՝ մեր իրավապաշտպան կոլեգաները իրենց հերթին՝ հաստատ զբաղվելու են թե՛ այս, եւ թե՛ բազմաթիվ այլ դեպքերով: Պիտի հասնենք նրան, որ ՀՀ-ում չլինի չբացահայտված խոշտանգման դեպք:
Հույս ունենանք, որ անպայման կբացահյտվի տվյալ խոշտանգման փաստը, եւ այո՝ այն կդառնա նախադեպ մնացած դեպքերի բացահայտման համար:

 ՆՈՆԱ  ԱԴԱՄՅԱՆ