«Մենք դեմ ենք պատմության կեղծմանը» Կլոր սեղան-քննարկում

ՀԱՅՏԱՐԱՐՈՒԹՅՈՒՆ
 
Ժամանակակից աշխարհում դեռ կան պետություններ, որոնց քաղաքական ղեկավարությունը չի ցանկանում հրաժարվել քաղաքական և անձնական նպատակներով սեփական, իսկ երբեմն նաև այլ երկրների պատմության կեղծման արատավոր պրակտիկայից:
Բազմազան տեղեկատվության լայն հասանելիության պայմաններում էլ ավելի է դժվարանում ցորենը որոմներից առանձնացնելը, ճշմարտությունը ստից տարբերելը:
Հանուն ներքաղաքական և աշխարհաքաղաքական շահերի պատմության կեղծումը և պատմական փաստերի նենգափոխումը դառնում է միտում և սպառնալիք ոչ միայն մեր տարածաշրջանում, այլ ամբողջ աշխարհում:
Այս միտումը զգալիորեն խթանվում է պոպուլիզի դրսևորումներով, որը լուրջ համաշխարհային մարտահրավեր է դարձել, քանի որ պոպուլիզմի վրա հիմնված իշխանությունը դադարում է տարանջատել  ճշմարտությունը կեղծիքից, ինչից և սկսվում է ցանկացած հասարակության բարոյական հիմքերի խարխլումը:
Տարբեր քարոզչական կենտրոններ կասկածի տակ են դնում ոչ միայն Հայրենական մեծ պատերազմի հետ կապված պատմական իրադարձությունները, այլև հիմնարար պատմական ճշմարտությունները, ինչը դրսևորվում են ժամանակակից տարածաշրջանային քաղաքականության իրականացման ընթացքում: Մասնավորապես կեղծիքի օբյեկտ են դառնում Լեռնային Ղարաբաղին վերաբերող պատմական փաստերն ու իրադարձությունները:
Դրա վառ ապացույցն է իբր պատմական ադրբեջանական հողերի վերաբերյալ պաշտոնական Բաքվի թշնամական և կեղծարար հռետորաբանությունը Հայաստանի ներկայիս իշխանությունների լռության ֆոնին:
«Մենք դեմ ենք պատմության կեղծմանը» թեմայով կլոր սեղանի մասնակիցները սույնով հայտարարում են իրենց նվիրվածությունը ինչպես այսօր, այնպես էլ ապագայում պատմական փաստերի կեղծման ու պատմական իրադարձությունների աղավաղված ներկայացման դեմ պայքարի գործին:
Մենք դատապարտում ենք պատմության կանխամտածված խեղաթյուրումն ու կեղծումը և հայտարարում ենք, որ այդպիսի քաղաքականությունը որպես արատավոր երևույթ անընդունելի է և դրա դեմ պետք է պայքար մղել բոլոր հասանելի և ընդունելի մեթոդներով ու միջոցներով: