Մենք թույլ չենք տա, որ Հայաստանում ուկրաինական սցենար զարգանա. Հրապարակ

Ռուսաստանի Լիբերալ դեմոկրատական կուսակցության առաջնորդ Վլադիմիր Ժիրինովսկին, քաղաքագիտական ֆորումներից մեկում անդրադառնալով Գյումրիի սպանդին, սենսացիոն հայտարարություն է արել, Հայաստանի մասին խոսելով որպես Ռուսաստանի մաս: Իր գրառման մեջ նա համոզմունք է հայտնել, որ կատարվածը Հայաստանում նարնջագույն հեղափոխություն կազմակերպելու փորձ է, եւ կազմակերպել է ԱՄՆ-ն: «Գոսդեպն արդեն սկսել է լկտի վրաերթեր կատարել Ռուսաստանի դեմ: Նրանք կազմակերպել են խեղճ հայ ընտանիքի սպանությունը, հավաքել են տեղի ֆաշիստներին եւ մեզ վրա հարձակում են սկսել, այս անգամ արդեն Կովկասից: Հայաստանը միշտ եղել է Ռուսաստանի հետ եւ կմնա Ռուսաստանի կազմում: Թող բոլորն իմանան, որ մենք թույլ չենք տա, որ Հայաստանում ուկրաինական սցենար զարգանա»,- գրել է նա: Վերջում ԼԴԿ նախագահը հիշեցրել է, որ Հայաստանում հզոր ռազմաբազաներ ունեն, եւ սպառնացել է. «Մենք արագ կհանգստացնենք Գոսդեպի ֆաշիստներին եւ 2 ժամում կարգուկանոն կհաստատենք: Եվ ոչ ոք թող դրանում չկասկածի»: Ի դեպ, Ժիրինովսկին միայնակ չէ այն կարծիքի մեջ, որ այս սպանդը Հայաստանում արեւմտյան ծագում ունի՝ հատուկ կազմակերպվել է հակառուսական տրամադրություններ հրահրելու նպատակով: Ռուսական որոշ շրջանակներ կիսում են այս տեսակետը: Անշուշտ, ռուսական իրականությունում բոլորը չէ, որ Ժիրինովսկի են, կան նաեւ շատ մտավորականներ, հասարակ մարդիկ, ովքեր հասկանում են կատարվածի ողբերգականությունն ու դրանից բխող հետեւանքները: Նրանց մի մասը ներողություն է խնդրում գյումրեցիներից, մյուսները ցավակցում են, երրորդները՝ վստահեցնում, որ ռուս ազգը միայն «ժիրինովսկիներից» չի կազմված: Հավատում ենք, սակայն հավատն ու սերը դարերով ձեւավորվում են, բայց մի ժամում կարող են անհետանալ: