Մեր տղաները ցույց տվեցին, որ ամուր են կանգնած սահմանին

Ղարաբաղա-ադրբեջանական սահմանը կրկին լարված է եղել: Այսօր վաղ առավոտյան ադրբեջանցի դիվերսանտները փորձել են հերթական անգամ ցույց տալ իրենց ռազմական վատ պատրաստվածությունը եւ անցնել սահմանը: Սակայն, ինչպես ասում են, սահմանին հայ զինվորն է կագնած, ով անգամ իր արյան գնով պատրաստ է պաշտպանել իր տունը, հարազատներին ու հայրենիքը, ինչպես դա արեց ավագ լեյտենանտ Զորիկ Գեւորգյանը: ԼՂՀ-ում տիրող իրավիճակի եւ մի շարք այլ հարցերի վերաբերյալ, Fnews.am-ը զրուցեց ԼՂՀ նախագահի մամլո խոսնակ Դավիթ Բաբայանի հետ.

-Պետք է նշեմ, որ մեզ մոտ որեւէ խուճապ չկա, դուք տեսաք, որ ամեն ինչ անցավ այնպես, ինչպես եւ պետք է անցներ: Ճիշտ է, դժբախտաբար մեր կողմից կա մեկ զոհ, որը մեզ համար ողբերգություն է, բայց մեր տղաները ցույց տվեցին, որ ամուր են կանգնած, որ բանակը շարունակում է իր դերակատարությունը պատվով իրականացնել, որպես Արցախի Հանրապետության եւ անկախության հիմնական երաշխավոր: Բնական է, որ հակառակորդը նույնպես այս ամենը տեսնելով պետք է համապատասխան հետեւություններ անի: Այն, որ մենք միշտ խոսում ենք, թե կողմակից ենք հարցի խաղաղ կարգավորման, դեռեւս չի նշանակում, որ մենք թույլ ենք, կամ վախենում ենք: Պարզապես մենք անցել ենք այդ պատերազմի միջով եւ չենք ցանկանում, որ դա նորից կրկնվի, միայն աննորմալ մարդը կամ պետությունը կարող է պատերազմ ցանականալ, իմանալով, որ դա ողբերգություն է, մահ է, կորուստներ է… Ադրբեջանական էլիտան չի անցել այդ պատերազմի միջով, նույնիսկ նրանց որդիները սահմանագծին 200-300 կմ մոտ անգամ չեն գնացել, դրա համար էլ այդպես են խոսում: Եթե Ալիեւը, իր ողջ ընտանիքը կամ բարեկամները լինեին այդ խրամատում, ապա նա իրեն նման կերպ չէր դրսեւորի՝ ուղարկելով ուրիշի երեխաներին, որ այնտեղ զոհվեն: Ի վերջո, պետք է հասկանալ, որ ցանկացաց մայր՝ լինի հայ կամ ադրբեջանցի, իր որդու կորուստը ողբում է: Սակայն ադրբեջանական իշխանությունների համար սա լոկ շահարկումների մի ձեւ է եւ կոպիտ ասած նրանք թքած ունեն այդ մայրերի ացունքների վրա

-Արդյո՞ք նման քայլերով ադրբեջանի իշխանությունները փորձում են բանակցային գործընթացը տանել փակուղի:

-Այս գործելաոճն արդեն դարձել է, այսպես ասած, ակնհայտ մի քաղաքականություն, այն է՝ Ադրբեջանը լինելով դիվերսիոն պետություն պետք է դիմի նմանատիպ քայլերի, այլ ելք չկա, որովհետեւ այն արդեն վաղուց դարձել է ֆաշիստական դիվերսիոն պետություն: Մենք այդ մասին բազմիցս ենք խոսել ու իրազեկել ենք միջազգային հանրությանը, որ այս պետությունում ընթանում են որոշ գործընթացներ, որոնք նոր իրավիճակ կարող են ստեղծել, որոնք առաջին իսկ հերթին վտանգավոր են այդ նույն ադրբեջանական ժողովրդի համար: Մենք հիմա տեսնում ենք, որ մեր ասածն այսօր իրականանում է: Ադրբեջանը դիվերսիոն պետություն է, դրա համար էլ իր ոճն այդպիսին պետք է լինի:

-Փաստորեն, նրանք դեմ են քաղաքակիթ բանակցություններին եւ փորձում են ռազմական խաղիկներո՞վ հարցը լուծել:

-Նրանք դիմելու են շանտաժի, ռազմական մեթոդների փորձեր կատարում են, որ տեսնեն իրավիճակ փոխվել է, թե՝ ոչ, որ հասկանան ինչ անեն: Վերջերս տեղի ունեցած իրադարձությունները եւ մեր կողմից հակառակորդին դեն շպրտելը, ագրեսիայի կասեցումը եւս մեկ անգամ նրանց ցույց տվեց, թե ինչ էր լինելու, եթե նրանք դիմեին ռազմական գործողությունների:

-Իսկ միջազգային հանրության եւ համապատասխան կառույցների ընդհանրական մոտեցումները սահմանում տեղի ունեցող իրադարձություններին ինչպե՞ս կգնահատեք, օրինակ՝ ԱՄՆ պետդեպարտամենտի այսօրվա հայտարարությունը:

-Միջազգային հանրությունը պատանդ է Ադրբեջանի ձեռքին: Իհարկե, մենք հասկանում ենք, որ այդ հայտարարություններն ադրեն պետք է հասցեական լինեն, բայց մենք նրանց էլ պետք է հասկանանք, պարզապես իրավիճակն այնպիսին է, որ նույնիսկ եթե հրապարակային ձեւով նրանք փորձում են ընդհանուր մոտեցում ցուցաբերել, ապա կասկած անգամ չունեմ, որ ոչ հրապարակային խողովակներով նրանք հասցեական են դիմում եւ ինչ պետք է ասում են Ադրբեջանին:

                                                                                  
Սոսե  Չանդոյան