Մեռնեմ օրենքին. նախարարը` հետեւելու է...

ՀՀ բնապահպանության նախարար Արամայիս Գրիգորյանը, Fnews.am-ի հետ զրույցում անդրադառնալով մեր  հրապարակումներից մեկին,hամաձայն որի Լվովյան փողոցի վրա էլիտար շենք է կառուցվում բնության, էկոլոգիայի ու ծառեր հատելու հաշվին, ասել էր հետեւյալը.
-Եթե էլիտար շենք են կառուցում, ծառի վրա կարո՞ղ են էլիտար շենք կառուցել: Բնականաբար ծառը պետք է կտրեն, որ շենք կառուցեն, եթե դրա օրինական թույլտվությունը ունեն:
-Այսինքն նման մասշտաբային ծառահատումները նորմա՞լ եք համարում:
-Ես ընդհանրապես ծառահատումը նորմալ չեմ համարում, բայց եթե մարդու մասնավոր տարածքում է, եւ մարդն ինքնուրույն որոշում է կայացնում… Մենք ունենք օրենքներ, եւ շարժվում ենք օրենքներով: Եթե նա հատի ապօրինի տեղում, բնականաբար տուժ-տուգանքի կենթարկենք եւ բնական եմ համարում, որ այդպես էլ պետք է լինի: Բայց մարդու սեփականության մեջ մենք չենք կարող մտնել, առավել եւս կան պայմանագրային հիմունքներ, եթե մարդը մեկ տեղ հատում է, բնականաբար պարտավորություն պետք է վերցնի մեկ այլ տեղ հատուցումը փոխարինելու:
-Փաստորեն նորմա՞լ եք համարում, որ կանաչ տարածքները սեփականաշնորհվում են եւ ծառահատումներ են իրականացնում,ու էլիտար շենք են կառուցում:
-Ես նորից եմ կրկնում, ընդհանրապես նորմալ չեմ գնահատում էն խնդիրը, որ էսօր ծառեր են հատվում: Քանի որ մենք դրա կարիքն ու պահանջն ունենք: Առավել եւս մենք դա պիտի ավելացնենք, բայց ոչ նվազեցնենք, բայց դա եթե մարդու սեփական տարածքում է եւ օրենքի սահմաններում է, մարդը կտրում է մենք ի՞նչ կարող ենք անել, կարո՞ղ եք ինձ ասել:
-Այստեղ նաեւ կանաչ տարածքները սեփականաշնորհելու թւյլտվության հարցն է:
-Դա արդեն մեր խնդիրը չի:
-Մի խոսքով հետեւողական եք լինելո՞ւ:
-Այո, իհարկե: Մենք հետեւողական ենք լինելու, որ եթե կլինեն ապօրինի հատումներ, բնականաբար յուրաքանչյուր քաղաքացի անկախ իր կարգավիճակից պատասխանատու է` իր արարքների համար:
-Իսկ մինչ օրս՝ Ձեր պաշտոնավարման օրից սկսած մարդիկ պատասխանատվության ենթարկվե՞լ են:
-Մենք արդեն լուրջ գործունեություն ենք ծավալել, մեծ քանակությամբ նման դեպքեր ունենք դա փայտի տեսքով վաճառման ժամանակահատվածում ենք հայտնաբերել եւ գործերն էսօր արդեն քննչական մարմիններում են գտնվում, հարկային մարմիններում են գտնվում: Մեր կառույցների կողմից համապատասխան տուժ-տուգանքներ կիրառվել են եւ ասեմ, որ կարճ ժամանակահատվածում մենք արդեն 20 միլիոնից ավել գումար ա մտել դեպի բյուջե: Զուտ չարաշահումների հետեւանքով՝ տույժ- տուգանքների առումով:

Տեսնենք, թե որքանով է մեծարգո  նախարարը հետեւողական լինելու իր հայտարարությունների ու ասածների նկատմամբ, քանի որ ձախ թեքվի` <մերոնք> են, աջ թեքվի`<մերոնք> են, իսկ թե ինչ է ստացվում այդ դեպքում, հայտնի է բոլորին: Այնպես, որ չի բացառվում, որ այս նախարարությունում եւս շարունակվի այն <աջաբսանդալը>, որը պատրաստվել է դեռեւս նախորդ նախարարի`Արամ  Հարությունյանի`Բուլկի Արամի օրոք...Հատկապես, որ այս նախարարության <տամոժնայով> են անցնում բազում հարցերի պատասխաններ ու դրական լուծումներ, որոնք հենց այնպես, <օդից> չեն ընկնում...

Սոսե  Չանդոյան