«Մետաքսի» կրակոցները «շարունակվում են». քրեական հետախուզության բաժնի պետն ազատվել է. «Ժամանակ»

«Ժամանակ»-ն անդրադարձել է օրեր առաջ Մետաքսի մոտ հնչած կրակոցների դեպքին:

Ըստ թերթի՝ դեպքից նոր մանրամասներ են հայտնի դարձել: Լրատվամիջոցը հիշեցնում է, որ նշված տարածքում ուշ երեկոյան «Մետաքս Գոլդ»-ի աշխատակիցներ եղբայրներ Վահագն և Վլադիմիր Գևորգյանների ու մետաքսի Պելեի աներորդի Դավիթի միջև տեղի էր ունեցել վիճաբանություն, որն ավարտվել էր կրակոցներով: Կրակոցներից տուժել էին նաև երկու երիտասարդ, ովքեր ուղղակի գտնվել էին այդ տարածքում:

Թերթի տեղեկացմամբ՝ Վահագնը և Վլադիմիրը թաղային հեղինակություն համարվող Կաբել Արթուրի շրջապատից են, ով մտերիմ է կապի և տրանսպորտի նախարար գագիկ Բեգլարյանի հետ:

Ինչպես լրատվամիջոցն է ներկայացնում, նույն գիշեր կողմերը հաշտվել են և պայմանավորվածություն են ձեռք բերել գործի ընթացքը փոխել և իրականությունն այլ կերպ ներկայացնել:

Իսկ Մետաքսի Պելեի աներորդի Դավիթին ջրից չոր դուրս բերելու համար, ըստ թերթի, սցենար է կազմվել:

«Այդ գործի համար արդեն իսկ ոստիկանության Էրեբունու քրեական հետախուզության բաժնի պետը փոխվել է: Նոր պետ է նշանակվել նախկինում Նոյեմբերյանի քրեական հետախուզության բաժանմունքի պետ Էդգար Ալեքսանյանը»,- գրում է թերթը և հավելում, որ այս տեղեկությունը Ոստիկանությունից պաշտոնապես հաստատել են:

«Ժամանակ»-ի տեղեկություններով՝ փորձում են իրադարձություններն այնպես դասավորել, որ իբր այդ գիշեր բուքմեյքերական գրասենյակի մոտ կրակոցներ արձակողներն այլ մարդիկ են եղել:

Միաժամանակ թերթը հիշեցնում է, որ դեպքի առթիվ հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի 1-ին, 6-րդ, 7-րդ կետերով և 235-րդ հոդվածի 1-ին մասով:

Մանրամասները՝ թերթի այսօրվա համարում