Մեղադրվում է Սեդրակ Զատիկյանի սպանությունը կատարելուն դրդելու մեջ

ՀՀ քննչական կոմիտեի հատկապես կարևոր գործերի քննության գլխավոր վարչությունում ավարտվել է Սեդրակ Զատիկյանի սպանության դեպքի առթիվ հարուցված քրեական գործի՝ դրդչի մասով առանձնացված վարույթի նախաքննությունը:

Նախնական քննությամբ ապացույցներ են ձեռք բերվել, որ 2006 թվականի հունիսին Սեդրակ Զատիկյանի սպանությունը դրդելուն մասնակցություն է ունեցել քաղաքացի Ն.Խաչատրյանը։ Վերջինս Ս.Հակոբյանի հետ, նախնական համաձայնությամբ, նախկինում ունեցած վեճի պատճառով վրեժխնդիր լինելու նպատակով, Ա.Առուշանյանին նյութապես շահագրգռելով, դրդել` պատվիրել է սպանել Սեդրակ Զատիկյանին:

Ա.Առուշանյանը, ընդունելով Սեդրակ Զատիկյանին գումարի դիմաց սպանելու պատվերը, 2006 թվականի հունիսի 22-ին` ժամը 14:45-ի սահմաններում, Ա.Հովհաննիսյանի և Լ.Ղևոնդյանի օժանդակությամբ, Երևան քաղաքի Սեբաստիա և Տիչինա փողոցների հատման խաչմերուկում, 1992 թվականից ապօրինի ձեռք բերած և այդ պահին կրած, հրազեն հանդիսացող «ԱԿՍ» տեսակի ինքնաձիգով, շատերի կյանքի համար վտանգավոր եղանակով, սպանելու ուղղակի դիտավորությամբ, կրակոցներ է արձակել Սեդրակ Զատիկյանի վարած «Մերսեդես Բենց G-55» մակնիշի «10 ՏՏ 045» պետհամարանիշի ավտոմեքենայի վրա։

Արդյունքում՝ ավտոմեքենայի ղեկին նստած Սեդրակ Զատիկյանը և պատահական անցորդ Կարինե Սարգսյանը տեղում մահացել են: Սպանությունից հետո Ա.Առուշանյանը Ն.Խաչատրյանից և Ս. Հակոբյանից, վերջիններիս ընկերոջ միջոցով, Երևան քաղաքի Ջրվեժ թաղամասում ստացել է սպանության դիմաց խոստացված գումարի մի մասը, իսկ մնացած մասը չի ստացել՝ հետագայում ունեցած տարաձայնությունների պատճառով:

Ն.Խաչատրյանին որպես մեղադրյալ ներգրավելու որոշումը կայացվել է 2007 թվականի հուլիսի 9-ին, և նույն օրը նրա նկատմամբ հայտարարվել հետախուզում։ Վերջինս հայտնաբերվել է 8 տարի անց՝ 2015 թվականի մայիսին։

Մինչդատական վարույթում ձեռք բերված ապացույցների համակցությամբ` Ն.Խաչատրյանին մեղադրանք է առաջադրվել ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով, և նրա նկատմամբ խափանման միջոց է ընտրվել կալանավորումը:

Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին, մեղադրական եզրակացությունը հաստատվել է, և գործն ուղարկվել Երևան քաղաքի Մալաթիա-Սեբաստիա վարչական շրջանի ընդհանուր իրավասության դատարան:

Նշենք, որ մյուս 4 մեղադրյալների մասով քրեական գործերը դատարան են ուղարկվել ավելի վաղ, և կայացվել է մեղադրական դատավճիռ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: