Մեղավորը`կպատժվի. եկեք չշատապենք, չխանգարենք քննությանը.Վալերի Օսիպյան

Ինչպես հայտնի է, Երեւանում հունիսի մեկի գիշերը դանակահարվել է 22-ամյա երիտասարդ, ում, ըստ մամուլում շրջանառվող լուրերի, դանակահարել է Նուբարաշենի բնակիչ 22-ամյա Սեդրակ Օսիպյանը:Վերջինս Երեւանի փոխոստիկանապետ Վալերի Օսիպյանի եղբոր տղան է: Նշենք, որ դեպքի առթիվ հարուցվել է քրեական գործ ,ՀՀ քրեական օրենքի 112 Հոդվածի 1 կետի (Դիտավորությամբ առողջությանը ծանր վնաս պատճառելըկամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որեւէ օրգանի կամ օրգանի ֆունկցիայի կորուստ կամ արտահայտվել է դեմքի անջնջելի այլանդակմամբ, ինչպես նաեւ կյանքի համար վտանգավոր այլ վնաս է պատճառել առողջությանը կամ առաջացրել է դրա քայքայում` զուգորդված ընդհանուր աշխատունակության ոչ պակաս, քան մեկ երրորդի կայուն կորստով կամ հանցավորի համար ակնհայտ մասնագիտական աշխատունակության լրիվ կորստով կամ առաջացրել է հոգեկան հիվանդություն, թմրամոլությամբ կամ թունամոլությամբ հիվանդացում) հատկանիշներով: Հավելենք, որ փոխոստիկանապետ Վալերի Օսիպյանը մամուլում իրարամերժ պատասխաներ է տվել, մի տեղ նշելով, որ իր եղբոր որդին կապ չունի այդ դեպքի հետ, մեկ այլ տեղ էլ, նշում է, որ վեճի մասնակից եղել է, բայց ոչ դանակահարող:
Թե, ի վերջո, վերը նշվածներից, ո ՞րն է իրականությանը համապատասխանում, փորձեցինք պարզել անձամբ փոխոստիկանապետ Օսիպյանից, ով նշեց.
-Իրականությանը չի համապատասխանում տեղեկությունը, որ եղբորս որդին մարմնական վնասվածքներ է հասցրել տղային, ամեն դեպքում քննությամբ թող պարզվի: Մեղավորը անպայման կպատժվի, օրենքի առաջ բոլորն էլ հավասար են` ով էլ, որ լինի:
-Այսինքն, Ձեր եղբոր որդին կռվին մասնակցել է, բայց դանակարհողը ինքը չի եղե՞լ:
-Եկեք չշատապենք, չխանգարենք քննությանը, բայց, որ ես համոզված եմ, որ ինքը մարմնական վնասվածք չի հասցրել, դա հաստատ է:
-Ուզում եք ասել, եթե ամեն դեպքում պարզվի, որ Ձեր եղբոր որդին է դանակահարողը, պատասխանատվություն կկրի՞:
-Համոզված եմ, որ ինքը չի մարմնական վնասվածք հասցնողը, բայց, նորից եմ կրկնում. բոլորը օրենքի առաջ հավասար են, բոլորը պետք է պատասխան տան օրենքով:
Հավելենք, որ Էրեբունի ԲԿ-ից հայտնում են, որ գիշերը իրենց մոտ տեղափոխված Վանուշ Ալեքսանյանի վիճակը գնահատվում է ծանր:

Տաթեւիկ  Աբրահամյան