Մի լարեք առանց այն էլ լարված իրավիճակը..

Այն, որ հունվարի 31-ին Հայաստանի քաղաքացիները Ժիրայր Սեֆիլյանի գլխավորությամբ ցանկացել են քաղաքացիական խաղաղ երթ իրականացնել, դա հասկանալի է, բայց անհասկանալի է այն, թե ինչու հենց Արցախում, ինչու մեր համար այսպիսի օրհասկան ժամանակ, և ինչու ցեղասպանության 100 ամյա տարելիցի նախօրյակին: Սա ուղղակի անհեռատես ու անողջունելի քայլ է, քանի որ, եթե Արցախի Հանրապետությունը այսօր փաստացի գտնվում է պատերազմական իրավիճակում, ու գրեթե հատկապես վերջին օրերին անընդհատ տեղի են ունենում սահմանի երկայնքով գնդակոծություններ, կարծում եմ՝ անկարելի է նմանատիպ ակցիաներ անցկացնել Արցախում: Եկեք մի պահ պատկերացնենք, որ այդ խաղաղ երթը ինչ-ինչ առումներով ավելի լայնածավալ բնույթ էր կրելու և հանկարծ ու վերածվում էր ոչ խաղաղ երթի, ու ինչ-որ խժդժություններ էր սկիզբ առնում Արցախում: Այս պարագայում ինչ էր լինելու՝ սահմանին կանգնած մեր թշնամին ուրախանալու էր, թե հարձակվելու էր, թե ինչ-որ մեկ այլ սադրիչ գործողություն էր իրականացնելու: Վերջապես ով էր կրելու պատասխանատվություն նման իրավիճակ ստեղծելու համար, որը կարող էր ունենալ անդառնալի հետևանքներ: Այս ամենը անկանխատեսելի կլիներ և թե ինչ ընթացք կունենար, ոչ ոք չի կարող ենթադրել, հետևաբար, իմ կարծիքով գոնե այսօր Արցախում նման բաներ կազմակերպելն ուղղակի արկածախնդրություն է: Այս ամենից բացի կա ևս մեկ վատ երևույթ, որը նկատեցի մեր որոշ լրատվական կայքերում: Հարգելի´ որոշ լրագրողներ, զսպեք ձեզ և ձեր ցնցումնալից նյութերի հրապարակումներով տարաբնույթ որակավորումներ մի հնչեցրեք, հունվարի 31-ին տեղի ունեցածը բնութագրելով ինչ-որ ադրբեջանական գործողություններ և դրանով չգիտեմ ում ջրաղացին ջուր մի լցրեք: Բացի դա ազգովի պատրաստվում ենք ցեղասպանության 100 ամյակին նվիրված միջոցառումներին, ու հիմա մենք իրավունք չունենք մեզ նման բաներ թույլ տալու, քանի որ մեզ այսօր առավել քան երբևէ միասնական լինել է պետք, այլ ոչ թե գործողություններ կամ հայտարարություններ, որոնք կլինեն բնութագրիչ՝ սահմանելով արցախցի, հայստանցի կամ սփյուռքահայ անվանումներով: Մեզ անհրաժեշտ է միասնական հայ լինելու գաղափարը և մեկ ազգ լինելու գաղափարը: Հարկ է փաստել մեկ հանգամանք ևս, որ այսօր աշխարհում, ինչպես նաև մեր տարածաշրջանում տեղի են ունենում նոր իրողություններ, նոր բաժանումներ, որոշվում են նոր սահմաններ, և համապատասխանաբար գերտերությունների կողմից տեղի են ունենում նոր խաղեր:
Ուկրաինայի դեպքերը այդ նոր աշխարհաքաղաքական խաղերից մեկն է, որտեղ ազգը մասնատվել է, և միմիանց դեմ են կռվում, և այդ ամենը հանուն ինչի, իհարկե ակնհայտ է, հանուն օտար ուժերի շահերի, ուստի ելնելով այս դեռևս թարմ դեպքերից, մենք պետք է դասեր քաղենք և նմանատիպ սխալներ թույլ չտանք: Իսկ այն, որ Ժիրայր Սեֆիլյանը ազգային հերոս է, դա միանշանակ հարգանքի է արժանի, սակայն այդ գործողությունը ուղղակիորեն կապ չունի հերոս լինելու և այլ կոչումների հետ:
Կոչ եմ անում, որպեսզի սթափ դատեք և չլարեք առանց այն էլ լարված իրավիճակը:   

Garsik Saghatelyan-ի ֆեյսբուքյան էջից