ՄԻ պաշտպանն ու քաղհասարակությունը կմշակեն ՄԻԵԴ վճիռների կատարման վերաբերյալ դիրքորոշումներ

Մարդու իրավունքների պաշտպանի աշխատակազմում տեղի է ունեցել Եվրոպայի խորհրդի Նախարարների կոմիտեի՝ վճիռների կատարման եւ բարեկամական կարգավորման պայմանների վերահսկողության կանոնների 9-րդ կանոնի շրջանակներում ներկայացվող հատուկ դիրքորոշումների վերաբերյալ քննարկում:

«Ես կարեւորում եմ Մարդու իրավունքների եվրոպական դատարանի վճիռների կատարման, դրանցում արձանագրված խախտումները հետագայում բացառելու եւ անհրաժեշտ օրենսդրական եւ գործնական փոփոխություններ իրականացնելու նպատակով հատուկ դիրքորոշումներ ներկայացնելու գործընթացի շարունակական բնույթը: Այդ գործընթացում մենք շարունակելու ենք համագործակցությունը ինչպես Եվրոպայի խորհրդի համապատասխան ստորաբաժանումների, այնպես էլ ՀՀ քաղաքացիական հասարակության հետ»,- Եվրոպայի խորհրդի եւ Մարդու իրավունքների պաշտպանի աշխատակազմի կազմակերպած քննարկման ժամանակ բացման խոսքում ասել է ՀՀ մարդու իրավունքների պաշտպան Արման Թաթոյանը:

ՄԻԵԴ վճիռների կատարման դեպարտամենտի ստորաբաժանման ղեկավար Պավլո Պուշկարը, նույն ստորաբաժանման իրավաբան Վահե Դեմիրճյանը, ՄԻԵԴ-ում Հայաստանի Հանրապետության կառավարության լիազոր ներկայացուցչի գրասենյակի աշխատակիցը, քաղաքացիական հասարակության, ինչպես նաեւ Պաշտպանի ներկայացուցիչները քննարկել են Պաշտպանի եւ քաղաքացիական հասարակության ներկայացուցիչների կողմից համատեղ դիրքորոշում մշակելու եւ ներկայացնելու անհրաժեշտությունը:

Պայմանավորվածություն է ձեռք բերվել ՄԻԵԴ վճիռների կատարման գործընթացում ներկայացվող հատուկ դիրքորոշումները պատշաճ կազմելու նպատակով հրատարկված համապատասխան ձեռնարկը թարգմանել հայերեն եւ կազմակերպել հատուկ դասընթաց: