Մի շարք բանկեր դադարեցրել են կանխիկ վարկերի տրամադրումը.

«Հրապարակ» թերթը գրում է. «Դոլար-դրամ տատանումներն իսկական աժիոտաժ առաջացրին վերջին օրերին: Այդ աժիոտաժն անդրադարձավ նաև բանկերի վրա, որոնցից որոշները, գուցե, սկսեցին կա՛մ սպեկուլյացիաներ անել, կա՛մ էլ պարզապես դադարեցնել վարկերի տրամադրումը: Մի քանի բանկերում անցկացրած մեր հարցախույզը ցույց տվեց, որոշ բանկեր այս օրերին պարզապես հրաժարվել են վարկեր տրամադրել հատկապես դրամով: Իսկ դոլարով՝ խնդրեմ:

«Յունիբանկից», օրինակ, մեզ ասացին, որ ապառիկի դեպքում վարկավորում իրականացնում են դրամով, իսկ, այ, սպառողական վարկ չեն տրամադրում: Մյուս կողմից, սակայն, տեղեկացրին, որ նույն սպառողական վարկը՝ դոլարով, կարող են վերցնել քաղաքացիներն իրենց մոտից 20 տոկոս տոկոսադրույքով: «Յունիբանկը» նաև դոլարի և մյուս արտարժույթների ազատ առքուվաճառք է իրականացնում:

Հարցին, թե ինչն է պատճառը, որ այս պահին դրամով կանխիկ վարկեր չեն տրամադրում, արդյոք դոլար-դրամ տատանումնե՞րն են պատճառը, «Յունիբանկից» մեզ ասացին հետևյալը. «Այո, որպեսզի սպեկուլյացիաներից զերծ մնանք, կանխիկ վարկերը դադարեցրել ենք ժամանակավորապես»:

«Առէկսիմբանկից» էլ մեզ տեղեկացրին, որ բոլոր տեսակի վարկեր՝ թե՛ դոլարով, թե՛ դրամով, տրամադրում են, նաև արտարժույթի ազատ առքուվաճառք է իրականացվում: Տվյալ բանկում դոլարային վարկերի դեպքում տոկոսադրույքը կազմում է 17-18 տոկոս, իսկ դրամի դեպքում՝ 20-24 տոկոս:

ԱԿԲԱ ԿՐԵԴԻՏ ԱԳՐԻԿՈԼ ԲԱՆԿԻՑ էլ մեզ ասացին, որ նպատակային վարկեր՝ ուսման, հիպոթեքային, ջեռուցման, տրամադրում են, իսկ առձեռն տրամադրվող վարկերը, օրինակ՝ սպառողական վարկ, այս պահին դադարեցված են: Բանկից մեզ ասացին նաև, որ իրենց մոտ սպառողական վարկերը միայն դրամով են տրամադրվում: Թե ինչն է դադարեցման պատճառը, արդյոք վերջին զարգացումնե՞րը, ԱԿԲԱ ԿՐԵԴԻՏ ԱԳՐԻԿՈԼ ԲԱՆԿԻՑ ասացին. «Հավանաբար»:

«Անելիք» բանկի պատասխանն ամենալավատեսականն ու պոզիտիվն էր: Բանկի աշխատակցուհին մեզ ասաց, որ վերջին ճգնաժամային զարգացումներն իրենց բանկի վրա որևէ կերպ չեն ազդել, և բանկն այս օրերին էլ շարունակում է ավանդներ ընդունել, արտարժույթի ազատ առքուվաճառք իրականացնել, իրենց մոտ ներդրումներ են կատարվում, նույնիսկ նոր մասնաճյուղեր են բացվել այս օրերին: «Եվ սրանք զուտ խոսքեր չեն»,-վստահեցրեց բանկի աշխատակցուհին: Բայց իրենց բանկում ևս շուրջ 5 օր է, այս պահին՝ ևս, որ ոչ մի տեսակի վարկեր չեն տրամադրվում, որովհետև «ծրագրի խափանում ունենք, որի հիման վրա վարկի դիմումներն ուղղակիորն չենք ընդունում»:

Հարցին, թե դոլարի վաճառք իրականացվո՞ւմ է բանկի կողմից, «Անելիք»-ից պատասխանեցին. «Այո, իրականացնում ենք դոլարի ազատ վաճառք՝ դրամարկղի եղած գումարի չափով»:

Մանրամասները՝ թերթի այսօրվա համարում։