ՄԻՋԱՆՑՔՈՒՄ ՏԱՍ ՀՈԳՈՎ ՀԵՏԵՎԻՑՍ ՀԱՐՁԱԿՎԵՑԻՆ

Հետընտրական աղմկահարույց պատմություններից մեկն էլ Օձուն համայնքի համայնքապետ ԱՐՍԵՆ ՏԻՏԱՆՅԱՆԻ հետ կատարվածն էր: Հիշեցնենք, ոմանք բառացի էին հասկացել Նիկոլի՝ մուրճերով գրոհի հրահանգը եւ մի տաս հոգով հարձակվել էին գյուղապետի վրա: Սրանից զատ, «Հայաստան» դաշինքն ահազանգեց, որ խորհրդարանական արտահերթ ընտրություններում այն համայնքների ղեկավարներին, որոնք դաշինքի թիմակիցներն են, սպառնալիքներով հորդորում են ինքնակամ հրաժարական տալ: Նրանց թվում նաեւ Արսեն Տիտանյանն էր: Գյուղապետի հաղորդման հիման վրա Լոռու մարզպետարանում նրան ծեծելու դեպքի առթիվ դատախազությունում քրեական գործ է հարուցվել, որը քննվում է քննչական ծառայությունում (ՀՔԾ): Այստեղից մեզ տեղեկացրին, որ կա գործով մեղադրյալ՝ առանց փակագծերը բացելու: Մենք փորձեցինք տուժող ճանաչված համայնքապետից պարզել, թե գոնե իրեն հայտնի է, թե ով է մեղադրյալը: Պարոն Տիտանյանը մեզ հետ զրույցում նախ վերոնշյալ փաստին հետեւյալ որակումը տվեց.

- Այսօրվա իշխանությունն ընդամենը ուզում է ցույց տալ, որ արդեն մուրճի քաղաքականություն են աշխատեցնում, ու դա շատ վատ է իրենց համար: Ի՞նչ ա նշանակում` համայնքապետին ասել ա՝ հրաժարական տուր, էն մարդն էլ ասել ա` դու ով ես, որ ինձ ասես՝ հրաժարական տուր, ես ընտրովի մարդ եմ, ես ոնց հրաժարական տամ, ես կարա՞մ քեզ ասեմ՝ հրաժարական տուր:

- Գիտե՞ք, թե ով է մեղադրյալ:

- Ինձ էլ են ասել, որ կան մեղադրյալներ, բայց, ով, ինչ, չեն ասել:

- Ըստ Ձեզ, քանի՞ մեղադրյալ պետք է լինի իրականում:

- Մոտ 10 հոգի են ինձ ծեծի ենթարկել, այդ թվում` մարզպետը:

- Բայց մարզպետն ասում է, որ չի եղել նման բան:

- Դե, ինչ ասեմ, ուրեմն կա՛մ ես եմ ստում, կա՛մ՝ ինքը: Քննությունը կպարզի, թե ով՝ ով է իրականում:

- Ձեզ վրա ճնշումներ այս պահին գործադրվո՞ւմ են:

- Ոչ, հիմա՝ ոչ: Էլ էսքանից հետո էլ ի՞նչ անեն:

- Իսկ մինչ ընտրությունները ճնշումներ եղե՞լ են:

- Չէ, ինչը ճիշտ է, ճիշտ է, չեն եղել:

- Հավատում եք նախաքննության օբյեկտիվությանը:

- Փորձում եմ, ճարներս ինչ:

մանրամասները՝Iravunk.com-ում:

 ԻԼՈՆԱ ԱԶԱՐՅԱՆ