Միջազգային կառույցները Երևանի քաղաքապետարանին փող չեն տալիս

Երևանի մետրոպոլիտենն այս տարի էլ չի վերանորոգվի: Ծրագիրը հերթական անգամ կտողափոխվի հաջորդ տարվա բյուջե: Այս մասին որոշման նախագիծը ներառված է Երևանի ավագանու՝ նոյեմբերի 26-ի նիստում:

Որոշման նախագածից պարզ է դառնում, որ Երևանի մետրոպոլիտենի վերակառուցման երկրորդ ծրագիրը տեղափոխվելու է 2015թ., քանի որ ծրագրի իրականացման համար Վերակառուցման և զարգացման եվրոպական բանկի և Եվրոպական ներդրումային բանկի խոստացած 4 732 994 900 դրամը Հայաստանին այս տարի ևս չի տրամադրվել:

Հիշեցնենք՝ այս ծրագիրը հետաձգվում է դեռևս 2012 թվականից, երբ մետրոպոլիտենի վերանորոգման առաջին փուլի ավարտից հետո միջազգային ֆինանսական կառույցների հետ ստորագրվեց երկրորդ փուլի մասին պայմանագիրը:

Նշենք, որ հատկացվող գումարի շրջանակներում նախատեսվում էր լուծել մետրոպոլիտենի ջրահեռացման խնդիրը, մասնավորապես՝ գործող դրենաժային թունելը հասցնել մինչև «Հանրապետության հրապարակ» կայարան, ինչը կնվազեցնի ստորգետնյա ջրերի մակարդակը և կբարելավի թունելների շահագործման պայմանները:

Բացի այդ, նախատեսվում էր իրականացնել նաև մետրոյի թունելների վերակառուցման և վագոնների վերանորոգման աշխատանքներ:

2012թ. ստորագրված պայմանագրով ծրագիրը պետք է ավարտված լիներ 2013 թվականի հուլիսի 1-ին: Սակայն, մինչ օրս չի էլ սկսվել: Իսկ ծրագրի համար անհրաժեշտ՝ Եվրոպական ներդրումային բանկի հետ վարկային և ԵՄ հետ դրամաշնորհային ֆինանսական համաձայնագրերի կնքումը այս կառույցների կողմից այս տարի էլ հետաձգվեց:

Բայց սա դեռ ամենը չէ: Վերակառուցման և զարգացման եվրոպական բանկը հետաձգել է նաև այս տարվա համար նախատեսված Երևանի ջրամատակարարման բարելավման ծրագրի՝ 770 685 000 դրամի վարկի տրամադրումը:

Պատճառը, ըստ քաղաքապետարանի, այն է, որ ծրագրի տեխնիկական աջակցության խորհրդատուի ընտրության հայտարարված մրցույթը բանկը չկայացած է համարել: Իսկ նոր մրցույթի անցկացումը դեռ երկար ժամանակ կպահանջի: