Միլիոնը`պղնձամոլիբդենային զամբյուղում

«Ինչ վերաբերում է յուրացումներին, ապա ոչինչ չկար, ընդամենը մի քանի միլիոն եվրոյի պատմություն էր, մի 120 մլն, անմիջապես վճարեցի, հարցը փակվեց... Չպիտի հորինեն, ինչ կա, թող էն ամենը գրեն, թե չէ յուրացո՞ւմ: Ումից պիտի յուրացնե՞նք, մե՞նք՝մեզնից: Նոր ստեղծվող մարմնի խորհուրդը, կկազմավորվի, հետո բոլոր հարցերին  կպատասխանեմ»: 

Մաքսիմ Հակոբյան

Եթե, ըստ Զանգեզուրի պղնձամոլիբդենային կոմբինատի խորհրդի նախագահի, լրագրողները չպիտի հորինեն, այլ պիտի գրեն այն մասին, ինչ կա, ուրեմն բացի յուրացումներից պետք է հիշատակեն նաև պղնձամոլիբդենային կոմբինատի՝ դեռեւս նախորդ վարչապետի օրոք վերցրած խոշոր վարկերի մասին, որոնք դեռ մարված չեն, եւ որի մասին բազմիցս մամուլն անդրադարձել է: Իսկ Մաքսիմ Հակոբյանը մի քանի միլիոն  Եվրոյի մասին կատակներ անելու փոխարեն կարող էր նաեւ մտածել, թե ինչպես է մարելու այդ վարկերը: Բացի այդ, առանց կրակի ծուխ չի լինում, եւ վերցնել ու կտրականապես հերքել այն լուրերը, որ կոմբինատից պաշտոնյաներ են հեռացվել խոշոր չափի յուրացումների համար, առնվազն անլուրջ է: Այլ հարց է, որ Հակոբյանը չի ուզում հնչեղություն տալ այդ սկանդալին եւ մտածում է՝ հարցերը լուծել ներքին կարգով:
Ինչևէ, նման իրադրություններում միշտ կա «տակից դուրս գալու» հարմար տաբերակ՝ խոստանալ, թե ամեն ինչ հետո կասվի, իսկ մինչ գա այդ «հետոն», սկանդալը մոռացված կլինի եւ ոչինչ ասելու կարիք էլ չի լինի: Եվ անհասկանալի է, թե ի՞նչ կապ ունի կոմբինատի խորհրդի նոր ստեղծվող լինելու հանգամանքը. ուրեմն եթե մի բան նոր է ստեղծվել, պետք է ոչինչ չանի՞: 

Արտյոմ  Եդիգարյան