«Մինասյանը եւ նրա հետեւում կանգնած որոշ ուժեր փորձում են իմ բերանը փակել».Գագիկ Համբարյան

ՇՊՀ նախկին ռեկտոր Սահակ Մինսյանը հերթական դատական հայցն է ներկայացրել հայտնի քաղաքական վերլուծաբան, ՇՊՀ դասախոս Գագիկ Համբարյանի նկատմամբ: Մասնավորապես, NewsMedia-ի հետ զրուցում   հետ զրույցում անդրադառնալով հայցի հիմքին,  քաղաքական վերլուծաբանը նախ նկատեց.

-Հայցը պարոն Մինասյանը ներկայացրել է դեռեւս մայիս ամսին: Հայցի հիմքում ընկած է` պատիվն ու արժանապատվությունը վիրավորելը: Խնդիրը հետեւյալն է. պարզվեց, որ պարոն Մինասյանը ընդունել է 2017 սեպտեմբերի 25-ից մինչեւ 2018 թվականի ապրիլ-մայիս ամիսը արված իմ գրառումները, որոնք իրենց մեջ պարոն Մինասյանի կողմից գործած բազմաթիվ ենթադրյալ հանցագործություններ, անօրինականություններ են պարունակում: Բայց ապրիլ ամսին արված իմ երկու գրառումները իրենց մեջ` ըստ պարոն Մինասյանի, վիրավորանքներ են պարունակել: Իհարկե, դա իր խնդիրն է, բայց պետք է նշեմ, որ այդ ամենն ուղղակի ծիծաղելի է, որովհետեւ այդ քայլով պարոն Մինասյանը եւ նրա հետեւում կանգնած որոշ ուժեր փորձում են իմ բերանը փակել:

Շատ մեծ անակնկալներ են սպասվում դատարանում

-Կմասնավորեցնեք, կոնկրետ ի՞նչ բառերից է վերջինս վիրավորվել:

- Պարոն Մինասյանը պարզվում է շատ վիրավորվել է այն փաստից, որ ես նրան
անվանվել եմ վատահամբավ եւ տխրահռչակ, ինչպես նաեւ սովետական փոքր չինովնիկ արտահայտությունից: Պարզվում է, որ երբ ես անդրադարձել եմ նույնաբովանդակ հայցին` նրան զրպարտել եմ, երբ գրել եմ, որ գործը կարճվել է: Պարզվում է, որ ես պետք է իրավաբանական գիտելիքներով այնքան օժտված լինեի, որ գրեի, որ գործը ոչ թե կարճվել է, այլ ընդամենը մնացել է առանց քննության: Պարոն Մինասյանը գտնում է նաեւ, որ եթե ինքը հայց է ներկայացնում եւ չի գալիս դատական պրոցեսներին` ես իրավունք չունեմ նշելու, որ վերջինս, փաստորեն ընդունում է այն ամենն՝ ինչ ես ասում եմ իր անձի վերաբերյալ: Հիմա ես շատ մանրամասներ չեմ ցանկանում բարձրաձայնել, որպեսզի վերջինս եւ իր պաշտպանները նախապատրաստվեն: Բայց վստահեցնում եմ, որ պարոն  Մինասյանին շատ մեծ անակնկալներ են սպասվում դատարանում, վստահեցնում եմ, որ պարոն Մինասյանին չի հաջողվելու` նախորդ դատական գործընթացներում կիրառված մեթոդներով իր ուզածին հասնել:

Ի դեպ, մոռացա ասել, (բանից պարզվում է)  պարոն Մինասյանը վիրավորվել է նաեւ, որ ես նրան ասել եմ, որ ինքը սիրում է ամեն ինչ նենգափոխել: Ես կրկնում եմ, որ նա ոչ միայն սիրում է նենգափոխել, այլ նաեւ, որ նա ստախոս է բառի բուն իմաստով: Կոնկրետ օրինակ բերեմ. երբ նախկին ԿԳՆ նախարար Լեւոն Մկրտչյանը հարցազրույց է տալիս եւ ասում, որ բազմաթիվ խնդիրներ, որոնք բարձրաձայնվել են պարոն Համբարյանի եւ Խորիկյանի կողմից՝ մենք արդեն լուծել ենք,  պարոն Մինասյանն ասում է, որ ոչ մի խնդիր չի եղել: Բա սա  նենգափոխել չի` ի՞նչ է: 

-Պարոն Համբարյան, տեղյակ եք ո՞ւմ է մակագրվել սույն գործը:

-Այո, պարզվում է՝ զարմանալիորեն սույն գործը մակագրվել է Շիրակի մարզի առաջին ատյանի դատարանի ամենաանգրագետ, գրագող դատավորներից մեկին` Լիլիթ Խաչատրյանին: Ով նախկինում բնակվել է Սահական Մինասյանի հետ նույն թաղում: Ես ոչ միայն տվյալ դատավորի կոմպետենտության վերաբերյալ շատ խիստ կասկածներ ունեմ, այլ նաեւ նրա` Սահակ Մինասյանի հետ կապերի:

Տվյալ դատավորը իմ նախորդ դատական հայցի վճիռը բառի բուն իմաստով գողացել եւ դրել է Հովհաննես Խորիկյանի վճռի մեջ: Այն դեպքում, երբ իմ գործը քննվել է այլ դատավորի կողմից. հիմա հարց է առաջանում ի՞նչ իրավունքով է տիկինը գողացել եւ տարականորեն «թխել» ուրիշի գործի մեջ: Կամ, տիկինն այնքան անգրագետ է, որ ՇՊՀ-ի պատմության եւ փիլիսոփայության ամբիոնը մի վճիռի մեջ երեք տարբեր անուններով է կոչում: Ես իրավունք ունեմ չէ՞ կասկածելու այդ տիկնոջ կոմպետենտության վրա: Էլ չեմ խոսում նրա եւ Սահակ Մինասյանի կապերի մասին: Այդ իսկ պատճառով խորհուրդ կտամ տիկնոջը, որ նա առհասարակ հրաժարվի այս գործից, սրովհետեւ ես չեմ գտնում, որ նա կարող է անաչառ դատավոր լինել: 

-Այսինքն կարծո՞ւմ եք, որ դատավորը ի սկզբանե կողմնակալ վերաբերմունք ունի Ձեր անձի նկատմամբ:

-Որպեսզի պատկերացնեք այդ դատավորի հակակրանքը իմ անձի նկատմամբ, ես բերեմ հետեւյալ փաստը. պարոն Մինասյանը զրպարտության եւ վիրավորանքի համար երկու գործերով ինձանից պահանջել է վեց միլիոն դրամ գումար: Դատավոր Խաչատրյանն էլ շատ արագ կալանք է դնում իմ ունեցվածքի վրա: Այն դեպքում, երբ դեռ որեւիցէ ֆինանսական խնդրի մասին խոսք չկա, ու չկա դատավճիռ:

Պատրաստեց՝ՆՈՆԱ ԱԴԱՄՅԱՆԸ