Մինչ Բերձորի դեպքը Բակո Սահակյանը հանդիպել էր Ժիրայր Սեֆիլյանի հետ. Հրապարակ

Ինչպես տեղեկացնում են մեր աղբյուրները` հունվար ամսին Բակո Սահակյանը Ժիրայր Սեֆիլյանին հրավիրել է Արցախ` հանդիպման: Հանդիպման մեկնած Սեֆիլյանին Բակո Սահակյանը հորդորել է Արցախը, որպես առաջին գիծ եւ առանձին հանրապետություն, այս փուլում չներքաշել հայաստանյան ներքաղաքական գործընթացների մեջ: Ըստ ղարաբաղյան մեր աղբյուրի, հանդիպման ընթացքում Սեֆիլյանն ասվածին առանձնապես «վերաբերմունք չի դրսեւորել», «սակայն Ղարաբաղից գնալուց մի քանի օր հետո նա հարցազրույց տվեց, ասաց, որ ավտոերթը դեպի Արցախ տեղի է ունենալու, ու եղավ այն, ինչ եղավ: Մենք Արցախում տպավորություն ունեինք, որ իրենք գալիս էին սադրելու, նկատեք` ինչ է ասում ոչ թե Սեֆիլյանը, այլ Իգոր Մուրադյանն այս ամենի մասին, տպավորություն է, թե արմատներով ղարաբաղցի Իգորն Ադրբեջանից է մեզ հետ խոսում»: Իսկ ինչո՞ւ էին ավտոերթի դեմ գնացած ոստիկանները զինված: «Ավտոշարասյունը կանգնեցրած ոստիկանները զինված չեն եղել»: Բլրի վրա ավտոմատավոր ոստիկաններ էին կանգնած: «Զինված ոստիկանները շատ հեռու են կանգնած եղել. մտավախություն, բոլոր դեպքերում, կար, որ հնարավոր է ավտոերթի մասնակիցներից ոմանց մոտ զենք լինի: Մի մոռացեք, որ մի կիլոմետր Բերձորից այն կողմ` Աղավնի գյուղի մոտակայքում էլ կանգնած էին Արցախի վետերանները, որոնք էլ իրենց հերթին դեմ էին այդ երթին, հասարակական կազմակերպության ներկայացուցիչներ էին այնտեղ, եւ մենք փորձում էինք թույլ չտալ որեւէ բախում. զինված ոստիկանները չեն միջամտել այդ ամենին, իրենք` ավտոերթի մասնակիցներն են հայհոյել ոստիկաններին»: Ոստիկանները ծեծել են Սեֆիլյանի կնոջն ու երեխաներին, ինչն ուղղակի խայտառակություն է: «Չի՛ եղել, չկա՛ նման բան»,- պնդեց ղարաբաղցի պաշտոնյան: