ՄԻՊ-Ը՝ աղանդավորների ու համասեռամոլների մասին

Վերջին ժամանակներս տարբեր երկրներից Հայաստան ներթափանցած տարատեսակ աղանդավորական շարժումների ու դրանց հնարավոր հետեւանքների մասին forums.am-ը փորձեց ստանալ ՀՀ Մարդու իրավունքների պաշտպան Կարեն Անդրեասյանի մեկնաբանությունը, ով ասաց.

- Եթե մենք չկարողանանք մարդկանց բացատրել, թե որն է իսկական վտանգավոր կրոնական կազմակերպությունը, կամ, որն է մեր եկեղեցու առավելությունը, մարդիկ, իհարկե կարող են որոշակի դեպքերում նույնիսկ վնասակար մոլորության մեջ ընկնել: Քանի որ կան կրոնական կազմակերպություններ, որոնք ապօրինի գործունեություն են ծավալում, վտանգավոր ազդեցություն են թողնում մեր քաղաքացիների, երեխաների վրա: Բայց այստեղ լուրջ մեծ օրենսդրական դաշտ է, եւ մենք չենք կարող արգելել կրոնական կազմակերպությունների գործունեությունը. դա կլինի սահմանադրության եւ օրենսդրության խախտում:

-Իսկ մտավախություն չունե՞ք, որ Հայ առաքելական եկեղեցու հետեւորդները, մի օր էլ հնարավոր է փոքրամասնություն դառնան:

-Դրա փոխարեն մենք կարող ենք այնպես անել, որ մարդիկ իրազեկ եւ գիտակից լինեն, հասկանան, որն է իրենց համար ճիշտը եւ իրենք ընտրեն, թե որ ճանապարհով են գնալու, իսկ այդ աշխատանքը պետք է իրականացնի եկեղեցին:

- Իսկ եկեղեցին այդ աշխատանքները, ըստ Ձեզ, չի՞ իրականացնում:

- Ես եկեղեցու աշխատանքները գնահատելու իրավունք չունեմ: Որպես քաղաքացի ես շատ եմ սիրում իմ եկեղեցին:

- Իսկ ի՞նչ կասեք Հայաստանում արդեն քիչ, թե շատ տարածում ստացած համասեռամոլների մասին. չե՞ք կարծում, որ դա տանում է հայ ավանդական ընտանիքների քայքայմանը:

- Իսկապես մեր հայ ավանդական ընտանիքներում ընդունված է, որպեսզի ընտանիք կազմեն կինը եւ տղամարդը: Բայց այսօր ընտանիքի օրենսդրական փոփոխման որեւէ գաղափար որեւէ մեկը չի առաջարկել:

Ն. ԱԴԱՄՅԱՆ