Մովսես Հակոբյանը ՊՆ բարեփոխումների եւ իր սիրելի նախարարի մասին

Հունիսի 6-ին Հանրային հեռուստաընկերությանը տված հարցազրույցում ՀՀ պաշտպանության նախարար Սուրեն Պապիկյանը խոսելով ԶՈւ Գլխավոր շտաբի պետի պաշտոնի մասին, ասել է, որ Պաշտպանության նախարարությունում կառուցվածքային փոփոխություններ անելուց հետո կստեղծվի նոր մոդել, ըստ որի՝ ԶՈւ գլխավոր շտաբի պետը կլինի պաշտպանության նախարարի առաջին տեղակալը։

«Օրենքը երկար ժամանակ շրջանառվել է կառավարությունում և առաջիկայում կներկայացվի Ազգային ժողով։

Բանակի կառավարման որոշակի փոփոխություն է կատարվում, դա հիմնարար փոփոխություն չէ, ամեն դեպքում Զինված ուժերը զբաղվելու է միայն երկրի պաշտպանությամբ, մարտական պատրաստությամբ։ Գնում, սպասարկում, ապահովում՝ այդ ամենով պետք է զբաղվեն նախարարության կազմում գտնվող այլ վարչություններ։ Այսինքն՝ սկսած թիկունքային ապահովումից, պետք է իրականացվի ոչ զինվորականների կողմից։ Շատ բաներ լինելու են պատվիրակված»,- ասել է Սուրեն Պապիկյանը։

Վերը նշյաի շուրջ ԳՇ նախկին պետ Մովսես Հակոբյանը ուշագրավ դիտարկում էր արել նշելով. «Եթե Պաշտպանության նախարարն ունակ լինի որոշում կայացնելու, ապա դա որևէ բանի չի խանգարի»:

Մենք փորձեցինք ավելի հստակ պատասխան ստանալ Մովսես Հակոբյանից, թե կոնկրետ Սուրեն Պապիկյանը ունակ է նման որոշումներ կայացնելու, ով նկատեց.

-Առաջինը այդ կառուցվածքը դեռեւս չի գործում, երկրորդ` դեռեւս պարզ չէ, թե այդ կառուցվածքով ով է լինելու որոշում կայացնողը` դա դեռեւս պարոն նախարարը չի պարզաբանել: Եվ երրորդ, ունակ է արդյոք Պապիկյանը նման որոշում կայացնելու, թե ոչ, ապա եթե խոսքը վերաբերում ռազմական որոշում կայացնելուն, իհարկե` ոչ: Դրա համար զինվորական մասնագետ է պետք:

-Նույն հարցազրույցում նախարարը ասաց, որ պատերազմի հավանականություն չեն տեսնում:

-Չեմ կարող մեկնաբանել, որովհետեւ ամբողջությամբ իրավիճակին չեմ տիրապետում: Բայց ենթադրում եմ, որ եթե Ադրբեջանի ցանկությունները բանակցային գործընթացում նույն Ադրբեջանը կարողանա կյանքի կոչել, ապա պատերազմ, բնականաբար, չի լինելու: Եթե չկարողացավ, ապա նաիր խնդիրները լուծելու է միանշանակ ռազմական ճանապարհով: Ես հիմա չգիտեմ, թե բանակցային գործընթացը ինչպես է գնում: Այսքանով ավարտենք:

ԻԼՈՆԱ ԱԶԱՐՅԱՆ

Iravunk.com