Մխիթար Մոս-Մուշեղյանի «Յանուս» թատրոնը կվերաբացվի

Hraparak.am-ը գրում է .
«Յանուս» արտիստական թատրոնը, որը ղեկավարում էր էքստրասենս Անի Մաջնունյանի սպանության մեջ մեղադրվող Մխիթար Մոս-Մուշեղյանը, շուտով կվերաբացվի: Այսուհետ ինպրովիզացիոն թատրոնը ղեկավարելու է Արամ Միքայելյանը, ով hraparak.am-ի հետ զրույցում պատմեց, որ ծրագրում են 2 ամսից ազդարարել թատրոնի աշխատանքները:

«Դեռ նախապատրաստման փուլում ենք գտնվում, որովհետև կոլեկտիվի անդամները տարբեր տեղերում աշխատանք են գտել ժամանակավոր, բայց ոչ ոք չի հրաժարվում թատրոնի վերաբացումից: Հասարակական կազմակերպությունների հետ պայմանավորվածություններ կան, դրանց շնորհիվ կազմակերպությունների մեջ գտնվող հաստատություններում ենք կատարելու ուսուցումն ու ներկայացումների ցուցադրությունը: Հավանաբար խումբը կհավաքվի նոր մարդկանցով, նոր դերասաններով».- նշում է Արամ Միքայելյանը, ով ժամանակին ղեկավարել է «Փարոս» իմպրովիզացիոն թատրոնը:
Ամենայն հավանականությամբ, թատրոնի բացումը կանեն «Բռնաբարված հարսանիք» ներկայացումով. «Ինքն այդպիսի մի ներկայացում ուներ, որը ցանկանում է, որ մենք այսօր նորից դնենք: Իհարկե դա դեռ քննարկվում է, քանի որ ինքը պետք է լինի այդ ներկայացման համար, քանի որ նախկին դերասանները լրիվ դեռ չեն հավաքված այդ բեմադրությունը կրկնելու համար, այնպես որ հաստատ չէ»:

Hraparak.am-ի այն հարցին՝ դերասաններն ինչպիսի՞ վերաբերմունք ունեն Մխիթար Մոս-Մուշեղյանի նկատմամբ, սկանդալներից հետո համաձայն կլինե՞ն վերադառնալ թատրոն. «Դերասանների մեջ կան տարբեր մարդիկ, որոշ դերասանների ցանկությունն այդքան էլ ձևակերպված չի, նրանք իհարկե ոչ մեկն էլ վատ բան չեն ասում, չեն ասում, որ այդպիսի բան է արել»: Նշենք, որ դերասանական կազմը ներառում է առնվազն 5-8 մարդ:
Մենք հետաքրքրվեցինք նաև Մխիթար Մոս-Մուշեղյանի հետ խորհրդակցո՞ւմ եք թատրոնի գործունեության հետ կապված. «Առաջին շրջանում իհարկե, ցանկությունն այնպես անելն է, որ իր համար լինի այդ ամեն ինչը: Սակայն ես չեմ կարող ասել, որ ես կկարողանամ այնպես անել, որպեսզի այս թատրոնը լինի այն թատրոնը, որը նա է պատկերացնում, դա կայուն, մնայուն կոլեկտիվ կդառնա և կզուգորդվի իր պատկերացումներով»:

Հիշեցնենք, որ 2015 թվականի օգոստոսի 5-ին ահազանգ է ստացվել, որ Աջափնյակ վարչական շրջանի բնակելի բազմահարկ շենքերից մեկի բնակարանում հայտնաբերվել է կնոջ դի։ Բնակարանի ննջարանի հատակին հայտնաբերվել է տանտիրուհու՝ 1960թ. ծնված Անի Մաջնունյանի դիակը՝ կտրող-ծակող առարկայով պատճառված բազմաթիվ մարմնական վնասվածքներով։ Դիակի զննությամբ հայտնաբերվել է դանակի շեղբ՝ մարմնի մեջ։ Դեպքի վայրի զննությամբ պարզվել է, որ տան իրերն ամբողջությամբ եղել են տակնուվրա արված, կահույքի դարակները՝ հանված, հագուստները՝ թափթփված։ Գործով մեղադրյալ է Մխիթար Մոս-Մուշեղյանը, ով այս պահին գտնվում է «Նուբարաշեն» քրեակատարողական համայնքում: Վերջինս չի ընդունում իրեն առաջադրված մեղադրանքը: Մխիթար Մոս-Մուշեղյանը հասցրել է երկու անգամ հացադուլ իրականացնել, պահանջում է իրեն ազատ արձակել, հայտարարում է, որ իրեն անօրինական են կալանավորել: